SANTO DOMINGO: E President di Federacion Nacional di Transporte Dominicano (Fenatrado), esta Ricardo de los Santos a laga sa recien cu e bandanan criminal cu ta ataca trucknan Dominicano na Haiti, a cambia nan forma di opera.
Anteriormente e meta principal di e criminalnan aki tabata pa nan ataca e trucknan, y bira doño di e carga. Pero esey a cambia awor.
Pues nan tabata secuestra e chauffeur y e truck pa horta e carga, y ora cu nan a caba di horta tur e carga, nan ta laga e chauffeur y e truck liber pa bay.
Pero awor e modus operandi a cambia! Awor nan ta prefera di keda cu e carga y e truck tambe.
Recien mes e criminalnan aki a libera tres chauffeur di truck, y nan a bin bisa cu e criminalnan hoben a keda cu e cargamento y e trucknan tambe.
Pesey awor, e Federacion ta haciendo un suplica na e chauffeurnan di truck pa nan no drenta teritorio Haitiano mas, y ta recomenda pa djis laga e carga atras na e punto di frontera mes.
Un mensahe fuerte a bay na tur chauffeur Dominicano, esta cu si nan drenta Haiti nan lo haci esey riba nan mesun responsabilidad. Pesey e Federacion ta recomenda pa no drenta Haiti, sea bo ta afilia cu e Federacion of no.
E tres chauffeurnan Joel Pineda Hernandez, Luis Diaz Peguero, y Wilson Alejandro Rodriguez a wordo laga den libertad e siman aki, despues di tabatin varios dia secuestra na Haiti.
Nan a yega frontera Dominicano bek canando na pia, y sin proteccion di autoridadnan Haitiano na frontera. Ora cu nan a drenta teritorio Dominicano, mesora nan a ricibi yudanza di autoridadnan, cu a tuma detaye di tur loke a socede.
