70 porciento di pashent por keda cu problema riba termino largo --- *Salud general di trahador lo influencia actividad comercial normal --- *Empresanan ta perde trahador clave sin reemplazante bon prepara
ORANJESTAD (AAN) — E forma cu na mayoria di pais ta atende cu e Coronavirus nobo, ta crea e impresion cu Covid-19 ta un asunto di Gobierno.
E responsabilidad cu gobiernonan ta carga den e maneho di e pais, a entrega na gobernantenan e tarea pa dicidi con e comunidad ta funciona durante y manera tin tur indicacion, despues di e Pandemia.
Sinembargo, e momento a yega pa gremionan cuminsa atende cu diferente factor cu ta den nan man y finalmente den consulta cu gobernantenan yega na formula pa enfrenta futuro.
Investigacionnan di DIARIO ta papia di un situacion sumamente serio cu ta desaroya y cu te awor ta wordo ignora mundialmente loke por tin resultadonan sumamente serio.
Pa atende cu e preocupacion serio riba e resultado hopi silencia di Covid-19, mester bolbe na e nucleo di problema provoca pa e malesa, cu ta produccion.
Ora ta papia di produccion no mester mira machinenan grandi, barco y avion. Manera for di e prome momento di e pandemia DIARIO a splica, ora ta papia di produccion mester papia na prome lugar di e hende tras di produccion tanto como comerciante y como trahador.
Pa comercio funciona como base di economia, mester di hende cu ta e trahador den tur funcion, pues hasta di e propietarionan mes cu ta traha den nan empresa.
Hende na e momentonan aki, manera nos a adverti, ta e problema mas serio cu ta sigui crece y no a nivela manera expectativanan a indica.
Tin dos aspecto cu mester tene na bista.
Covid-19 no ta un malesa incidental, pues un problema personal di salud cu ta afecta un hende.
Ta trata di un enfermedad cu ta afecta masa.
E forma cu ta atende cu malesa di personal, tabata tene na consideracion e temporada di griep y hasta posibilidad di brote di malesanan contagioso manera griep, dengue por ehempel.
AIDS a exigi atencion pero tabata tin forma mas facil pa preveni.
Preveni Covid-19 ta sumamente dificil pasobra un simpel encuentro hasta sin contacto, ta produci Covid-19.
Pa comunidad por a sigui funciona, medidanan mester a wordo tuma tur caminda y lamentablemente den hopi caso wordo kibra.
E otro aspecto importante di Covid-19 ta, cu den mayoria di caso e no ta despedi sin laga rastro y te awor mundo no tin un inventario real di loke e ta haci y por haci den tur hende.
Un persona cu wordo considera cu el a cura, no ta un persona cu no tin problema mas.
E hende cu ta wordo considera “cura” simplemente no ta wordo considera capaz pa transmiti Covid-19 mas.
Den cantidad di caso e persona ta sigui sufri di e efectonan di Covid-19 y mester regresa bida bida normal cu condicionnan di salud cu prome cu Covid-19 lo a wordo considera problema di salud cu ta stroba labor.
E realidad ta, cu si tur hende cu a keda cu un problema di Covid-19 keda cas, comunidad ta wordo paralisa.
Empresanan ya ta den problema ora nan perde nan trahadornan cu sea pa morto of pa condicionnan fisico riba tempo largo, no por presenta na nan trabou.
E problemanan mas importante cu ta afecta hende cu wordo infecta cu Covid-19, ta cansancio, mal condicion fisico, falta di concentracion, problema cu memoria, problema respiratorio, dolor di cabez.
Den practica esaki lo tin como resultado cu e trahador mester reduci su cantidad di hora di trabou, mester entrega su retiro of keda sin bay trabou pa un tempo prolonga.
E resultado di Covid-19 lo bira pa un empresa cu mester reemplasa cierto persona, baha volumen di trabou of tuma mas personal, haci mas gasto den preparacion di personal.
Den mundo medico, terapia profesional ta cuminsa ocupa un lugar importante tanto pa problemanan mental como pa condicionnan fisico.
E topico importante pa mundo a bira, con ta bay atende cu e defectonan produci dor di Covid-19 na e motor mas importante di economia, cu ta hende, cu ta exigi atencion urgente di planificadornan y dirigentenan den tur gremio, manera for di prome momento expertonan cu ta asisti DIARIO a indica.
