*Pabien na tur Tico residencia na Aruba
*Compartiendo e democracia y libertad cu ta reina den ambos pais!
ORANJESTAD (AAN) -- Manera semper ta biba den e curazon di cada un y di henter e pueblo Costaricense, adulto, hoben y mucha, cu hopi fervor y amor patriotico ta celebra e Dia di Independencia, cu ta tuma lugar Dia 15 di September.
Diadomingo awo, e Republica di Costa Rica, ta conmemora su di 203 aña di Independencia for di Spaña. Un celebracion cu ta extende durante henter e Luna di September.
E Ministerio di Cultura y Hubentud ta organiza e “Mes Patrio” cu un serie di actividad cu ta fomenta y promove e fervor patriotico den e pueblo Tico, y tur residente cu a acoge Costa Rica como nan di dos Patria, nan hogar!
Durante e Luna di September ta wordo organiza diferente conferencia tocante e historia di su Independencia, tambe tin presentacionnan musical na encargo di e siete Bandanan di Concierto di e Pais, estableci pa e Sistema Nacional di Educacion Musical, y di e Instituto Nacional di Musica. Tayernan di elaboracion di e farol di tur tipo di diseño y color, cu ta desfila e anochi previo na e desfile oficial uniforma den tur provincia, tanto di scolnan como di otro institutonan.
E Minister di Cultura y Hubentud a publica e siguiente breve relato, pa duna honor na e di 203 Aniversario di Independencia: “Costa Rica ta yega na su di 203 aña di bida independiente y nos mester celebra e momento historico aki cu fervor, pa locual, nos a prepara un serie di actividad pa tur publico, como un manera di promove y potencia e patriotismo y amor pa e tera aki, cu nos tin e bendicion di yama “nos hogar”.
Manera e Himno Nacional di Costa Rica ta bisa: “Bajo el limpido Azul de tu Cielo, vivan siempre el trabajo y la Paz”. Pabien na e pueblo Costaricense y tur residente Costaricence biba na Aruba Dushi Tera, compartiendo e democracia y libertad cu den ambos pais ta reina. Y no por keda sin menciona un danki special na tur e studiantenan Arubiano cu a scoge Costa Rica pa sigui, vooral, nan estudio di Medicina, y cu Diadomingo aki tambe ta participa den e magno celebracion di Independencia di e pais.
Skirbi pa Mercedes Monge.
