Dos di nuebe Ministro Gabinete Mike Eman II condena na prison
*Scandalnan ta hunga papel importante den postura Reino Hulandes
*Sacrificio di recuperacion financiero Aruba perdi den dos caso 2024
ORANJESTAD(AAN)—“Corupcion y mal maneho ta e armanan mas pisa cu por tin contra e imagen di gobernacion di un pais. Mundo no ta profundiza den kende tabata na mando pero ta mira e probabilidad pa gobernacion wordo likida y corupcion bira adorno di un gobierno.”
Entrada pa 2024 mester a bira pa Aruba un aña durante cual e reconocemento total di Reino lo a resulta pa e logronan enorme di e pais, cu a marca historia den Reino cu un recuperacion economico y financiero cu awor ta habri caminda pa alcansa mas stabilidad social.
Manera ta costumber di DIARIO, e ultimo lunanan di aña ta wordo uza pa presenta na Pueblo di Aruba no solamente resultado di e aña cu ta termina pero tambe e loke por spera den e futuro mas cercano.
Pa Aruba 2023 a bira historico a base di sucesonan cu cual henter mundo a wordo confronta, pero tambe situacionnan local cu tabata parce sumamente dificil pa wordo supera.
“Florin di Aruba tabata na peliger eminente y cu tur sinceridad mester admiti cu si Aruba no tabata parti di Reino, e pais na 2017 lo a aparece riba e lista di riesgo sumamente halto y den calamidad financiero y economico,”a wordo trece dilanti.
Na final di 2017, Aruba tabata lucha cu un turismo cu a wordo seriamente afecta pa e medidanan internacional cu a wordo tuma contra regimen Nicolas Maduro.
Turismo for di Venezuela a cay completamente mientras na mes momento e proyecto Citgo cu Aruba a presenta como su gran salbador, cu razon a wordo considera pa mundo henter, como un fantasia den e situacion internacional di e momento.
Financieramente Aruba tabata den un situacion di bancarota y un caos social, ya cu e promesanan cu a wordo haci na pueblo dor di Gabinete Eman pa loke ta trata e crecemento fabuloso di Citgo, a haci cu un parti importante di comunidad Arubano, a haci gastonan den cuadro di e situacion falso cu a wordo pinta.
Gobierno Evelyn Wever-Croes a logra recuperacion di Aruba, cu na 2020 na un forma inespera a cay completamente debi na e pandemia di Covid-19, sigui pa inflacion mundial cu prijs di petroleo y e Guera di Ukraine.
Sinembargo, e maneho financiero y economico di Aruba a percura pa Aruba sobrevivi y awe Aruba ta un ehempel pa henter Reino pa loke ta trata maneho responsabel.
Corupcion, sinembargo, a destrui Aruba cu a conoce scandalnan cu a rementa.
Scandalnan a rementa den Corte y esaki ta e arma cu a wordo entrega na Reino y ainda ta wordo entrega na Reino.
Informantenan a mustra DIARIO riba e realidad cu na final di 2023, Aruba ta confronta un 2024 den cual dos di e nuebe gobernantenan di Gabinete Mike Eman2, ta condena na castigo di prison.
Berguenza grandi di Aruba a bira cu Benny Sevinger no a bay prison pero a keda den Parlamento di Aruba, pasobra el a opone su caso cu a percura pa Aruba wordo cubri cu un luz scur cu lo no wordo lubida, pero lo briya na Mei 2024 ora su caso cuminsa resona den Corte di Apelacion.
Na mes momento tin Paul Croes, cu despues di a perde su prome caso penal hasta den Casacion, den e otro caso pa labamento di placa, na Maart mester presenta atrobe dilanti Huez.
Dos Ministro di Gabinete Mike Eman II a wordo condena na prison pa corupcion y esaki a zink e reputacion di Aruba den Reino, loke ta bini dilanti awor den e mundo politico di Den Haag actualmente.
Den Haag ta duna prueba na e momentonan aki con e imagen di Aruba a wordo afecta pa actonan di corupcion, cu ta exigi Parlamento di Aruba tuma medidanan pa evita ripitacion di e berguensa cu ta cubri Aruba, cu realmente ta un ehempel gubernamental pa mundo pa e forma cu durante Gobierno Wever-Croes a tuma medidanan pa habri caminda pa futuro.
Na e momentonan aki, Aruba mester ehempel pa Reino a base di su logronan, pero ta wordo mancha pa scandalnan, cu ta e base pa cual Reino kier medidanan di supervision, manera den e edicion di awe lo bini dilanti den otro articulo.
