Preparacion, diabierna 26 proximo den e sede consular:
*Voto den exterior ta 100% manual!
ORANJESTAD (AAN) — Anabel Lugo, Consul General di Republica Bolivariana na Aruba, a detaya con e proceso electoral ta cuminza.
INSTALACION DI MESANAN
“E caha electoral ta wordo habri Diabierna (26) pa 8’or di mainta, unda lo wordo conforma e presidente(a) di e mesa, un miembro y un secretario pa cada mesa. E consulado aki ta bay conta cu tres mesa electoral, pa locual cada mesa electoral lo conta cu un presidente(a), un miembro y un secretario” el a splica y a reitera tambe.
Ta verifica cu e bukinan ta corecto pa cada mesa, cuanto votante ta corespond’e pa cada mesa, y cu tin tur e actanan cu ta trece tur e material electoral.
El a sigui splica cu e testigonan di mesa cu ta wordo estableci, di acuerdo cu e partidonan politico cu ta participando den e eleccionnan, ta personanan acredita door di e CNE previo solicitud di cada partido politico.
“Anto, cada mesa electoral lo tin un testigo di mesa pa partido politico, cu na su bez nan ta nombra un prome y un segundo testigo suplente. Esaki pa si acaso den e proceso electoral si e prome testigo tin cu bay haci algun diligencia, e segundo testigo suplente lo substituie, y asina sucesivamente”, e dama a señala.
Consul Lugo a reitera con cada mesa ta conforma: Esaki ta un presidente(a), un miembro, un secretario y un testigo di cada partido electoral cu ta participando den e proceso aki.
Lugo a splica cu ta bay tin como 16 partido politico pero no ta conoci cuanto lo presenta nan credencial pa representa su partido politico.
DIADOMINGO DI ELECCION:
E eleccionnan ta inicia pa 5’or di mainta cu instalacion di e mesanan electoral. E proceso como tal ta cuminza pa 6 or di mainta pa 6’or di atardi of te ora tin electornan pafo pa drenta vota.
VOTO MANUAL:
Consul Anabel Lugo a duna di conoce cu e votacion den exterior ta cien porciento manual. Na Venezuela si ta voto electronico. E ta consisti di e “tarjeton” cu un ovalo den cual ta marca cu un X pa e candidato di preferencia. Tambe tin buki electoral y pafo lo tin e lista di e personanan pa cada votador ubica su mes den ki mesa ta corespond’e haci su votacion. Preferiblemente, cada votador cu eherc’e su voto ta retira pa su cas. Esaki ta lo mas sano, segun Consul Lugo. Hendenan por keda pafo di e Consulado, pero no paden, pasobra ta trata di un mision diplomatico y mester respeta e espacio aki.
E votantenan por bin bisti manera nan kier, pero NO por presenta cu propaganda politico!
EHERCE DERECHO DI VOTO CU RESPET Y CIVISMO:
Finalmente, Consul General Anabel Lugo a haci un yamada na su conciudadanonan residente na Aruba, pa bin eherce nan derecho di voto cu respet, civismo, y ademas ta importante, pasobra nan tur ta den un pais cu ta dunando acogida na nan tur.
