ORANJESTAD (AAN): Minister di Turismo, Dangui Oduber, a duna di conoce cu tin un proyecto den plan cu pa via di Covid no por a cuminsa cu ne.
El a splica cu net banda di e kiosconan na Welcome Plaza tin un rotonde cual aworaki ta di santo. Eynan kier a traha un 'stage' cu algun puesto di cuminda y bebida, cu musica y entretenimento pa e cruseronan cu ta yega y ta keda anochi.
Cu esaki ta duna oportunidad na e kiosconan pa ta habri un tiki mas largo cu e posibilidad di bende, a bisa.
Si tur cos ta sigui conforme e planificacion di recuperacion di turismo, cu Aruba Ports Authority ta haya su entradanan bek, cu e tabata tin den e añanan prome cu e pandemia, e ora lo haci e inversionnan necesario pa 'upgrade' y embeyece e area aki conhuntamente cu e terminal crusero, e mandatario a señala.
Pa loke ta e tanki, tin plannan riba kico lo haci cu ne conhuntamente cu 'Port City' . E ta un desaroyo integral conhuntamente cu e desaroyo di 'Downtown' pa asina 'upgrade' henter e area aki na beneficio di e localnan pero pa e turistanan tambe, Oduber a duna di conoce.
CRUSERONAN DEN JULI
Banda di esaki mester agrega cu e schedule di e yegada di varios barco crusero a bira conoci.
Pa loke ta luna di Juli, e barconan riba schedule ta: Celebrity Summit (8 Juli), Carnival Horizon (13 Juli), Celebrity Summit (22 Juli) y Carnival Horizon (27 di Juli).
