Miriam Parra, coordinador Comunicacion di Comando XX:
*Sin prensa liber no tin democracia
ORANJESTAD (AAN)—Na Bushiri Karting, a tuma lugar Diaranzon mainta, un conferencia di prensa yama pa e grupo Con Venezuela, relaciona cu e eleccion presidencial den e Republica Bolivariana de Venezuela.
Manera ta conoci e proceso electoral lo tuma lugar diadomingo awo, 28 di Juli 2024, y tambe e residentenan den exterior lo eherce nan derecho di voto den e pais unda nan ta biba, y den e caso aki, na Aruba.
E coordinador di comunicacionnan di e Comando di Campaña di XX Venezuela señora Miriam Parra, a hiba palabra na prome lugar, y a cuminza gradiciendo tur medio di prensa local, pa nan presencia.
El a bisa cu meta di e conferencia aki ta informa e Venezolanonan di hopi aspecto cu nan mester ta al dia. El a cuminza pa splica kende “Con Venezuela” ta.
“Con Venezuela ta un movimento cu a forma door di tur partido politico democratico uni, cu un lider principal cu nos tur conoce: Maria Corina Machado. Nos no tin nada mas di bisa, di nos lider Maria Corina Machado, pero manera boso tambe sa, e candidato diplomatico na ken nos ta apoyando, Dr. Edmundo Gonzalez Urrutia, ta nos candidato pa e Presidencia” Parra a declara.
El a sigui bisa cu pa tal motibo y hopi gradici cu Dios, ken confiando den su poder, e unico Rey di Reynan, nan tin e certeza cu e cambio pa e Democracia, un bida nobo, un comienzo nobo ta bay bin.
Parra a expresa cu nan mester di un cambio di bida no solamente pa e Venezolanonan, pasobra e tin efecto riba nivel mundial. El a destaca e importancia di e medionan di prensa, cu tin un libertad di expresion manera mester ta, pasobra si nan ta silencia e democracia lo no tabata posible y el a reitera su gratitud pa e presencia di prensa di Aruba akinan.
