Benny Sevinger mester a presenta su disculpa na Pueblo di Aruba - Rapport bo Aruba ta duna prueba pakico AVP mester ta den Gobierno? - Benny y Mike a skirbi historia con ta cumpra Pueblo cu placa di Pueblo
ORANJESTAD(AAN)- Ta increibel cu no solamente Benny Sevinger ta Miembro di Parlamento, pero mas ainda cu e ta kere cu e mester habri su boca cu ta corta palabranan di su propio abogado.
Ora analisa tur desaroyo den bida politico di Benny Sevinger, loke mas ta resalta ta e palabranan di su abogado, cu a bisa publicamente cu algo a socede y cu Caso Avestruz no ta algo cu a kita cay for di cielo
Benny Sevinger mester bay puntra su abogado si no ta berdad, cu e abogado cu ta defende Benny dilanti Huez a trece dilanti den publicidad cu algo a pasa den e caso aki pero cu Benny a bira victima di personanan cu el a confia.
Ora nos analisa tur e personanan cu a wordo detene y cu mester aparece dilanti Huez ainda pa scucha si nan ta culpabel of inocente den e caso Avestruz, nos ta puntra nos mes si Benny no mester sigui den bida politico cu e nomber Avestruz, pa e simpel motibo cu el a goberna cu su cabez den santo.
E personanan cu a wordo detene den e caso di corupcion cu terenonan di Pueblo di Aruba y cu ta sospechoso hunto cu Benny, cu ta acusado mayor y acusado central den e circulo aki, nos ta mira caranan conoci pa partido AVP, cu Benny Sevinger mester conoce for di momento cu el a haci su entrada den politica.
Si di berdad e otro sospechosonan a abusa di confianza di Benny Sevinger, e pregunta grandi ta, si por considera Benny Sevinger un persona skerpi of si Benny Sevinger mester wordo considera un cuchio cu no por corta ni papel muha.
Con un persona cu kier sali na defensa di Aruba por permiti su mes wordo uza dor di personanan cu tin mas raiz den AVP cu Benny?
Loke Benny y su “back to back” Mike mester haci awe, ta presenta nan disculpa na Pueblo.
Benny Sevinger awe mester pidi Aruba dispensa pa e hecho cu e ta den Parlamento di Aruba cu man mara como acusado cu ta pafor di prison pasobra su estadia preventivo den prison a wordo suspende.
Benny y Mike tabata tin curashi pa exigi Pueblo di Aruba pa acepta Benny Sevinger como preso den representacion di Pueblo di Aruba, loke Parlamento ta.
Si no tabata pa Gobernador cu a nenga di permiti Benny presta huramento, wardador di preso mester a keda cu Benny Sevinger den sala di Parlamento.
E hecho cu segun abogado (no cualkier persona) a bisa cu algo a pasa pero cu Benny Sevinger a wordo uza dor di otro hende, ta prueba cu Benny Sevinger ta asina skerpi cu e no por mira cu e ta cay den buraco.
E palabranan di su abogado a mustra, cu Benny por cay den trampa loke ta nifica cu Benny ta manera un avestruz, cu no ta mira su dilanti pero ta biba cabez den santo.
Awor con Benny por defende Aruba cu cabez den santo como avestruz? Con Benny por ta skerpi si e no por a defende ni su mes?
Cu Benny y Mike a haya voto, nos ta kere. Si analisa con hende ta haya voto, ta bati man pa Algemene Rekenkamer Aruba, cu a splica den su rapportnan con Benny y Mike a uza Un Biyon di Aruba pa cumpra tereno, pa crea entrada pa esun cu nan kier a acepta como contratista grandi of chikito.
Si abuso di placa di Pueblo tin un nomber, e yama proyecto Bo Aruba, cu sigur no ta papia di un Benny Sevinger y Mike Eman cu no sa kico nan ta haci, pero di politiconan cu curashi pa spart placa di pueblo pa nan haya voto.
Cu Benny kier tumba Gobierno pa AVP bolbe den Gobierno, nos por comprende. Pasobra pafor di Gobierno, AVP no por uza placa di Pueblo pa e cumpra voto y asina e mentalidad di corupcion tene Mike y Benny na mando.
AVP mester ta den Gobierno manera a keda demostra den e caso Fondo Desaroyo Nobo San Nicolas, ta wordo confirma awe continuamente den rapportnan oficial cu ta exigi AVP disculpa su mes enfrente Aruba.
Lo ta bon pa Benny cuminsa prepara pa defende su mes dilanti Huez caminda un homber cu kier dirigi Aruba mester demostra cu e ta cay den buraco cu su mes hendenan, pues no otro partido, a coba pa su persona!
