Lyonel Dirksz, Comision Celebracion Dianan Nacional:
*Lo mira nan na entrada di Manifestacion Cultural
ORANJESTAD (AAN)—Lyonel Dirksz, di Comision Celebracion Dianan Nacional, a hiba palabra den conferencia di prensa y el a cuminza na gradici tur e partnernan financiero cu ta sostene tur e eventonan nacional pa aña 2024, entre otro Dia di Betico y aworaki Dia di Himno y Bandera.
El a gradici Ministerio di Cultura, Departamento di Cultura, Oficina di Turismo (ATA), SETAR, Triple A, Utilities, WEB Aruba NV, NV Elmar y UNOCA, cu tambe ta sostene tur e proyectonan cu e Comision tin pa 2024.
Manera tur aña, nan tin proyectonan pa scol, pa encurasha tur e alumnonan rond di e celebracion, den e caso aki, di Himno y Bandera.
“Durante tur e dianan aki, manera por a mira, nos a parti diferente poster, cu e dianan aki a bay na tur scol, unda riba e posternan aki tin tur informacion pa loke ta bira e dos proyectonan cu nos tin, tanto pa scol preparatorio y tambe scol basico, unda nos ta pidi e docentenan pa pone nan na un caminda visible, p’asina aki e muchanan por participa den diferente competencia cu ta bay tin. Nos ta bay den dos competencia, y esun prome ta fotografia, mirando cu awendia den tur cas tin celular y celularnan tin camara cu por saca potret. Den e caso aki scolnan por acumula mas tanto potret posible, door di e muchanan”, Dirksz a indica.
El a agrega cu muchanan ta bay saca potret den compania di famia, di partinan di Aruba unda nan ta sinti orguyoso di dje. “Importante ta cu na momento cu nan saca e potret, despues lo skirbi un nota pakico e parti unda cu e potret aki ta wordo saca ta haci nan orguyoso di Aruba, y nan ta entregue na nan klas.
E idea ta cu cada klas scoge e miho potret p’asina aki mand’e pa nos email adres, y na final nos ta bay scoge e potret cu lo bay gana tanto pa scol preparatorio y scol basico pa cual tin un premio tambe pa e klas cu gana esaki”, Lyonel Dirksz a relata.
Lyonel a splica cu e bunita di esaki ta cu tur potret lo wordo poni den forma digital, na exposicion, na entrada di Plaza Libertador Betico Croes dia 17 y mayornan y e muchanan por mira nan potret un biaha mas riba pantaya grandi cu ta bay tin na entrada di e celebracion di manifestacion cultural.
