Evento na Beach Tennis Aruba Club
ORANJESTAD (AAN): E tan anticipa ITF Beach Tennis Pan American Championship 2024 ta cuminsa e siman aki, entrante awe Diahuebs dia 7 di November na Beach Tennis Aruba Club cu participacion di 17 pais y mas di 270 atleta.
E campeonato Pan Americano ta regresa Aruba despues di 5 aña, uniendo e mihor atleta nan for di tur rincon di Americas y Caribe den un demostracion vibrante di atletismo, talento, teamwork y orgullo nacional y internacional. Esaki lo ta un evento emocionante cu lo mira hungadornan internacional competi bao nan bandera nacional, incluyendo 50 atleta di beach tennis di Aruba, cu a train duro durante e ultimo 3 luna nan pa e momento aki.
E aña aki, e campeonato ta sosteni pa dos di e compania nan local di cual Aruba ta orguyoso, cual ta CMB N.V. y Ennia Aruba. E dos organisacion nan aki a demostra un compromiso increible y firme pa cu desaroyo di deporte y iniciativa comunitario na Aruba, y nan apoyo na un notificacion corto ta instrumental pa hunto cu Beach Tennis Aruba a hasi e evento aki bira un realidad.
Mientras cu e torneo ta progresa, espectadornan por spera di biba cu wega nan yen di energia, cu algun di e mihor atleta nan di beach tennis, tur luchando pa yega na e nivel mas halto y promove e spirito di union internacional. E presencia di professional nan cu hopi experiencia y strea nan nobo di nos region ta mustra e importancia creciente di Beach Tennis rond mundo, y tambe especialmente na Aruba, caminda atleta nan local ta cla pa pone nan nomber riba un podio internacional.
Uni cu nos mientras nos ta apoya nos atletenan local y internacional den e celebracion inolvidabel di deporte, cultura y comunidad. Bo por sigui nos atleta nan local via e pagina di Facebook di Beach Tennis Aruba, caminda e schedule di e wega nan lo ta disponible.
Aruba ta cla pa ricibi e Campeonato Pan Americano di Beach Tennis! No perde e accion.
{gallery}Evento na Beach Tennis Aruba Club Competencia di ITF Beach Tennis Pan American Championship{/gallery}
