ORANJESTAD (AAN): E compania madre di un empresa di joyeria na Aruba, a aplica pa proteccion di bancarota di Capitulo 11 na Merca riba Diaranson.
Esaki a socede na United States Bankruptcy Court pa distrito di Delaware na Merca.
Ta trata di e joyeria ‘Alex and Ani’, y e activonan calcula di e compania ta varia entre 100 y 500 miyon Dollar, como tambe su pasivonan calcula, segun nan documentonan presenta na e Bankruptcy Court.
E conocido propietarionan di Mall na Merca, esta Simon Property Group Inc. y Brookfield Property Partners LP ta entre e creditornan di mas grandi no garantiza, ya cu cada uno e Joyeria tin cuenta habri di mas di $3 miyon den pago di huur, segun Bloomberg News a raporta.
E productonan di Alex and Ani ta inclui armband cu charms, y cadena di garganta. Nan a wordo funda na 2004 door di Carolyn Rafaelian, y nan tin punto di benta na Merca, Panama, y Aruba.
Na Aruba, e tienda di Alex and Ani ta na La Hacienda Mall riba Irausquin Boulevard dilanti Highrise Hotelnan.
‘Chapter 11’ na Merca ta un tipo di bancarota cu ta permiti e re-organizacion di e asuntonan di negoshi, debe, y propiedadnan. Negoshinan generalmente ta pidi Chapter 11 ora cu nan mester di tempo pa restructura nan debe. Esey nifica cu e negoshi por sigui opera y hasta habri bek completamente operando sin problema.
