Ora papia di family and friend Mike Eman mester cera su boca
*Cuanto placa Aruba a paga Mike pa sirbi como sombra di su ruman??
*Mike mester corda con el a tira anker den Conseho di Minister na 1986
ORANJESTAD (AAN) — Na varios ocasion DIARIO a splica Aruba kende realmente ta e angelito Mike Eman, cu aparentemente a nace cu un solo vision su dilanti: e mester ta e figura central tur caminda cu e ta.
A bira custumber cu Mike ta ataca tur cu ta riba su caminda na un forma sin midi. Cuatro aña largo Aruba no a tende di Mike, cu a dicidi di keda for di Gobierno y Parlamento, pa bini solamente dilanti ora su partido ta den problema serio na man di husticia por ehempel.
Na tal oportunidad e angelito Mike, ta cambia di personalidad y ta lastra tur loke ta den su caminda cu un furia cu ta duna hopi di pensa.
Cu e caminda pa eleccion 2021 lo ta hopi sushi, tur hende tabata sa. Mike mester a bandona cashi mientras cantidad di partido ta sinti nan mes yama pa goberna awor cu Evelyn Wever-Croes a evita cu Aruba ta zink.
Con sushi e lo a bira tambe nos a adverti y continuamente nos a papia di 1985 ora trabou, sudor y dolor di Pueblo di Aruba dirigi dor di Betico Croes a habri caminda pa dinastia Eman bolbe na poder despues cu Pueblo a pone nan un banda a base di e formula yama (12-8) cu a haci Aruba hopi dolor.
Ta trabou di Betico, cu AVP a nenga di reconoce conoce como lider, a haci posibel pa Henny Eman dia Prome di Januari 1986 a bira Prome Ministro di Aruba y habri porta pa su family and friends.
E prome family cu a drenta Gobierno na man di Henny Eman, tabata su ruman Mike Eman cu a introduci na Aruba e sistema di “relacionista publico”.
Mike Eman a bira sombra di Henny Eman como Prome Ministro y tabata e dirigente di orkesta den Conseho di Ministro cada momento cu Henny Eman a logra funciona como Prome Ministro.
Tabata tin mas family and friends den e circulo mas cerca. E prome Gobierno di Aruba cu Betico Croes a logra pone riba nan stoel, tabata manera baile di stoel pa family and friend cu despues di basta tempo por a drenta Oficina di Gobierno atrobe.
Manera prome cu eleccion AVP mes tabata splica ora Venezuela a yuda nan gana eleccion pa motibo di Lago: “awor si nan a kibra Betico”.
Ta asina Mike Eman a bira sombra di e Prome Ministro Presidente di Aruba, cu ta su ruman.
Como family and friend di Henny Eman, Mike tabata crea su futuro. Cuanto placa pueblo a paga pa esaki no ta completamente conoci. Pero lo ta bon haci un inventario di calculacion for di 1986.
Ora Henny a baha, Tico a subi pa un rato pero Tico tambe tabata Croes y a bin resulta cu e tampoco ta sirbi pa AVP y loke Mike a programa a sosode.
Asina Mike, despues di a goberna gobiernonan di AVP for di 1986 como family and friend, a haya chens pa e haya e puesto cu el a consagra na su tata y abuelo cu no a logra loke Betico a logra.
Ta imposibel pa cambia historia. No por mata historia. No por practica mentira riba historia, cu ta bira Hues pa mustra con cera di e estatua di su welo, Mike mester a bat sconde den Fort Zoutman, ora Hulanda a bin deshaci di Status Aparte cu Mike a destrui.
Mike a laga skirbi un buki di su bida ora ainda solo tabata na shelo, cu awe ta entrega Mike e berdad.
Mike a biba den un mundo di ilusion y a hinca Aruba den aventura.
Pero Mike hamas por papia di family and friend. Si tabata tin un family and friend cu a yega leu den historia di Aruba, e yama Mike Eman.
DIARIO lo sigui atende e topico aki ora nos caba cu e trabou cu nos tin pa atende tur e rapportnan y tambe casonan bau investigacion di family and friends cu tereno di Aruba y hasta cu huma di refineria di Aruba.
