ORANJESTAD (AAN): Desde comienzo di 2021, tin indicacion cu varios Venezolano a dicidi na bandona e isla di Aruba y a bay na otro paisnan den region
unda e chens ta mas grandi pa nan bay establece nan mes y cuminza cu un bida nobo. Esey ta debi cu na Aruba, e posibilidad ey a bira minusculo.
Tin varios cu a logra bay Merca y awor a keda aya y a hasta haya trabao.
Tambe tin algun cu a bandona Aruba pa bay Republica Dominicana, cu intencion pa despues bay pa otro pais. Pero tin indicacion cu nan tambe a keda eynan mirando e hecho cu Gobierno di Santo Domingo ta bay purba na yuda e ‘refugiadonan’ aki.
Pesey mes, e siman aki a bira conoci cu un total di 42.952 Venezolano a cuminza cu e tramitenan pa regulariza nan situacion migratorio na Republica Dominicana, segun informacion cu Inmigracion na e pais a indica. Esaki ta djis e prome fase di un plan di Gobierno Dominicano pa haci e tramite aki.
A cuminza dia 12 di April 2021, y durante un luna largo, e Venezolanonan aki tabata por a haya acceso na e plataforma virtual di DGM (Inmigracion) pa solicita prolongacion di nan estadia, pasobra mayoria di e Venezolanonan ta na e pais cu permiso di ‘turista’ y ya caba nan a caduca.
Organizacionnan local na Republica Dominicana a haya cu esaki ta un ‘exito’, esta cu casi 43 mil Venezolano a aplica pa e plan den djis un luna. Loke a haci e proceso mas facil ta e hecho cu bo por a haci e tramite via un forma digital, y tambe cu nan ta acepta paspoortnan cu a caduca.
Di tur esakinan, tin un total di 3.600 mucha menor di edad cu a aplica, pues bo por anticipa cu como 9% di e aplicantenan lo bay pidi un visa di estudio.
E Fase 2 despues di a haya prolongacion di estadia, lo bay ta pidi un Visa sea via e website di Cancilleria, cu ta un tramite chikito pero cu bo ta pone acerca un documento cu bo tin certificacion di trabao of di estudio.
