Sacha Geerman, Policy Advisor na DAS:
ORANJESTAD (AAN) — Sacha Geerman, Consehero Politico na Departamento di Asunto Social (DAS), den entrevista cu DIARIO, a menciona cu e Comision di Derecho di Mucha ta existi desde aña 2001 y Husticia Hubenil ta parti di e Derecho aki.
E Comision tin un constelacion nobo desde 2014, y e ultimo añanan nan ta enfoca riba e tratado completo, y nan ta promove e importancia di e derechonan di mucha y con nan por cumpli cu nan.
“Nos tin varios tarea. Un di nan ta aconseha gobierno, concientiza pueblo y tambe raporta internacionalmente, cada cinco aña. E aña aki, recien, nos a tuma e decision pa e añanan nos dilanti, nos pone enfoke riba un area specifico cu ta e area di Husticia Hubenil. Husticia Hubenil ta abarca esnan menor di edad (0-17) cu den un of otro forma ta bin den contacto cu husticia. E por ta un delito chikito of un falta grandi”, Sacha Geerman a señala.
Geerman a agrega cu e Tratado di Derecho di Mucha, ta conta tambe pa e proceso menciona tambe; e proceso completo.
El a agrega cu e Comision, na e momentonan aki ta haciendo un serie di entrevista pa haya informacion, cu tur e instancianan cu ta traha riba e area akinan.
Akinan por pensa riba Centro Reclassering, Formacion Social, KIA en particular (afdeling di hoben), pero tambe por pensa riba Ministerio Publico, y asina, diferente stakeholder cu tin di haber cu e grupo akinan. Nan ta wak den ki grado e proceso di Derechonan di Mucha ta wordo implementa, aki tambe.
Recientemente, e Comision a cuminza cu e investigacion cu ta wordo haci den KIA, pa haya cifra y tambe na Reclassering pasobra nan ta traha tambe cu e hobennan aki, directamente. “Nos tin varios afspraak traha caba pa e simannan cu ta bin, y despues di esey, nos lo stipula un plan di accion. Nos kier fiha riba cosnan cu por logra a corto plazo, pero tin cosnan tambe cu ta tuma mas tempo. Enberdad, nos ta den era nobo, un era moderno cu tin cu tene cuenta cu varios aspecto, por ehemplo tecnologia cu ta un di nan mas avanza, y mester pone atencion na dje. Pero nos kier sali afo cu e necesidad di e stakeholders cu ta traha riba e area aki”, Sacha Geerman a señala.
