ORANJESTAD (AAN): Comerciantenan Uni ta splica cu e balanza di igualdad pa cu trato di tur hende den comercio, no ta bon nivela!
Net esnan cu si ta cumpliendo cu tur protocol y reglanan sanitario, ta mira cu nan negoshi ta bashi. Y tur e otronan cu no ta preocupa cu ningun regla, nan tabatin establecimentonan pata-pata den fin di siman cu a pasa.
Frans Ponson di Comerciantenan Uni a splica cu den fin di siman ta tur hende por a mira e pachanga cu tabatin na varios establecimento, esta baliamento estilo jump-up y ningun hende ta preocupa cu regla di distanciamento social.
No mester tuma Comerciantenan Uni na malo. Corda cu aña pasa ora cu e pandemia a bati porta na Aruba, cu nan ta esnan cu a sostene Gobierno y tur regla, ora cu e isla a bay den Lockdown y turistanan a stop di bishita e isla.
Claro e comerciantena a elogia con Gobierno a handle e situacion, como cu e tabata un novum pa mundo y pa Aruba. Y na su turno, danki na Hulanda tabata un bon gesto cu comerciantenan a wordo yuda cu subsidio di salario.
Corda cu ora cu e pandemia a start, y cu Aruba a bay riba lockdown tabatin algun comerciante cu riba e prome dia ya caba a entrega yabi di negoshi bek na doño di edificio, pa mustra cu nan lo no bay habri mas.
Pero segun Ponson di Comerciantenan Uni, e problema a start ora cu tabatin eleccion, unda cu tur partido a lubida di e medidanan imponi riba pueblo. Mientras cu Comerciantenan tabata sigui tur regla cuidadosamente cu monton di sanitizer na porta, borchi pa bisa cuanto hende mag di drenta, y decontamina toiletnan regularmente... toch a mira con partidonan politico a kibra tur regla.
Durante eleccion, hendenan a lubida e medida. Comerciantenan Uni ta un di esnan cu a bati alarma riba loke ta pasando eynan durante eleccion, pasobra medidanan mester cumpli pa tur hende.
Diripiente Gobierno a kita tur regla, y net e ora ey e variante Delta a haci entrada. Esaki a bolbe trece medida extra pa mitiga e brote di e variante Delta aki cu a cuminza aumenta e cantidad di contagio y tambe di morto door di Covid-19.
Comerciantenan Uni a compronde tur e medidanan ey, tabata di acuerdo cu nan.
Pero awor na October 2021, Comerciantenan Uni tin problema cu e medidanan! Pasobra net nan ta siguiendo regla y protocolnan di Gobierno y DVG. Gobierno tabatin deseo cu e isla lo a yega na 80% di herd-immunity, y Comerciantenan Uni a yuda pa logra esey tambe.
Pero awor ta na un punto cu tur hende sa cu Coronavirus aki lo no desaparece. Pues tin di bin cu un regla pa sa con ta biba cune awor.
Loke ta molestiando e Comerciantenan ta loke nan ta mira atrobe, cu Gobierno y DVG a bin cu un regla unda 150 hende maximo mag di ta paden (si e lugar ta apto pa wanta 150 hende).
Frans Ponson aki kier sa, ta cua lugar na Aruba por wanta 150 hende aplicando e distanciamento social di 1,5 meter? Ningun empresa comercial na Aruba tin algo asina cu ta existi.
Tambe a cuestiona e asunto di ‘satellite dancing’ unda bo tin di balia na bo mesa.
Pero den weekend cu a pasa, por a mira ningun hende ta atene nan mes na e reglanan aki, pues tabatin baliamento bay goal na diferente empresa. Con Comerciantenan Uni por bisa nan miembronan cu tin Bar of Restaurant cu no mag di balia, siendo cu na otro Barnan esaki ta wordo permiti sin cu ni un musca a bula.
Lo bay ta hipocrita pa Comerciantenan Uni bay informa nan miembronan cu no mag di haci esey, siendo cu otro negoshinan ta haciendo esaki toch.
Aki bo ta mira cu e comerciante cu si ta cumpli cu e regla di DVG, ta bira e comerciante mas perhudica. Comerciantenan Uni no tin problema cu regla, pero ta haya cu esaki tin di wordo haci husto.
Concierto mester bin: Segun Frans Ponson di Comerciantenan uni, e ta pensa cu e momento a yega pa Gobierno cuminza duna permiso pa Concierto.
Sea ta liga e permiso ey cu exigencia di Rapid Testing pa Covid of otro exigencia pa regla, bo tin di cuminza pensa riba e posibilidad pa cuminza tene concert. Pasobra simplemente pa awor e Coronavirus aki lo no desaparece mas.
No ta husto pa e comericante cu ta cumpliendo, ta keda sin bende, y otro comerciante cu no ta worry cu reglanan, e si ta logra tene evento y hasta baliamento estilo jump-up.
