BOGOTA: Jorge Armando Dorante Acosta ta deteni na Colombia, y e ta wordo yama tambe ‘Conejo Zanahoria’,
y ta un di e cabezantenan di narcotrafico cu contacto den hopi pais, incluyendo Centro America.
Un revista na Colombia a divulga cu den dianan venidero, e lo wordo extradita pa Merca, aunke algun luna pasa cu algun maniobra legal, el a logra di tarda su traslado pa Puerto Rico. Tur cos tabata cla pa DEA bay cune Merca, pero un decision di Huez a stroba cu e ta wordo manda. Pero despues a logra aclarea e asunto y awor hudicialmente e no tin ningun recurso mas.
Merca tin prueba cu Conejo Zanahoria aki tabata controla e rutanan di salida di cocaina for di estado Falcon na Venezuela. E tabata ricibi droga for di criminalnan Colombiano, y tabata pone nan abordo di botonan na costa y cu speedboat tipo Go-Fast tabata manda nan pa Puerto Rico, Republica Dominicana, y Curaçao.
El a wordo gara na November 2020 despues di un operacion intensivo hunto cu Polis, bao direccion di oficialnan anti-narcotico di Ministerio Publico, y asina a bin gare. Esaki a socede ora e tabata riba e caminda entre Cucuta y Bucaramanga.
Conejo Zanahoria tabata conoci pa e forma cu e ta coordina e maneho di placa pa e envio di droga. E tabata spera nan na e.o. Punto Fijo, tambe na Carirubana (Venezuela). Despues e ta coordina e traslado y distribucion na Colombia.
Ora cu Colombia a captura e capo aki, nan a notifica embahada di Merca mesora, pa asina cuminza traha riba tramitenan legal y diplomatico pa su extradicion, cu awor porfin lo bira realidad.
Jorge Armando Dorante Acosta tin di bay responde pa dos delito, esta traficacion di droga y labamento di placa. Pesey e ta wordo pidi pa US District Court na Puerto Rico.
Ministro di Husticia, Wilson Ruiz, a confirma cu e tramitenan pa e extradicion ta avanzando.
