Siman pasa despues cu el a bandona Aruba
ORANJESTAD (AAN): Siman pasa e barco crusero Symphony of the Seas tabata di bishita pa 13 ora largo mara den waf di Playa. E tabata riba un viahe di 8 dia den parti Southern Caribbean cu a sali for di Fort Lauderdale na Florida.
Sinembargo, despues di a bishita tanto Aruba y Curaçao den parti zuid di Caribe, e crusero tabata bayendo direccion nort pa pasa pariba di Republica Dominicana rumbo pa e isla di Labadee, cu ta situa net panort di Haiti.
Pero den e direccion aki, un pasahero Mericano di 57 aña di edad abordo di e barco a bira basta malo, te cu e medico abordo a dicidi cu e pasahero tin di wordo hiba cu urgencia pa un Hospital pa ricibi tratamento medico mas avanza. E pasahero tin sintomanan severo cu el a ricibi un atake di curazon.
Esaki a socede net ora cu e crusero tabata na un distancia di 116 miya zuidwest di Cabo Rojo, na Puerto Rico. Capitan di Symphony of the Seas a haci un yamada na US Coast Guard pa asistencia. Esaki a pone cu US Coast Guard a reacciona di biaha.
Nan a saca un MH-60T Jayhawk helicopter for di Air Station Borinquen, cu a move mesora den direccion di e barco crusero. Ora di yega eynan, e helicopter a baha un landado di rescate na e barco, cu a bay prepara e pashent pa evacua. Despues e ekipo di rescate na forma safe a hisa e pasahero abordo usando un brancard diseña pa evacuacion riba lama.
Riba e potret por mira Commander Raymond Jamros di e MH-60T Jayhawk Helicopter, kende a coordina e rescate, y a papia di e teamwork cu a logra nan haci e evacuacion bira exitoso.
“E tabata un esfuerso conhunto di tur hende. Nos ta aprecia e coordinacion entre e Air Sector, e Sector, y Royal Caribbean. E coordinacion efectivo y comunicacion a logra pa nos a yega eynan rapidamente y transporta e pashent bek pa tera pa tratamento medico rapido,” Commander Jamros a bisa.
Hasta si tabatin tempo calmo mes, un evacuacion for di cualkier boto ta un trabao hopi specializa y riesgoso. Si tempo ta mas bruto, bo tin di percura pa seguridad di e pashent y e ekipo di rescate, y tambe mantene helicopter stabil riba un barco cu ta moviendo, y tur eseynan ta retonan cu tin di tene cuenta cune.
Ademas, tanto e piloto di Helicopter y capitan di Symphony of the Seas mester mantene comunicacion constant pa sigura cu e barco ta mantene un direccion corecto y velocidad. Si bo stop e barco riba lama grandi, ta trece hopi mas reto extra, como cu olanan por trece mas peligro pasobra ta pone e boto yanga di banda.
Ademas di esey, a bira conoci cu Royal Caribbean a dicidi na cancela e bishita di e barco na e beach priva na Labadee na Haiti. Pasobra tin actonan violento di e pais cu a yega tambe te na Labadee. Pesey mes, awor ningun barco di Royal Caribbean por lo pronto no ta stop na Haiti mas.
