ORANJESTAD (AAN) -- Pa loke ta fuentenan di financiamento pa deporte, Comite Olimpico Arubano ta kere cu nan por aporta cu ideanan creativo,
y e Secretario General Nicole Hoevertsz a papia tocante esaki cu Minister Presidente y Formador. El a duna prensa e siguiente relato al respecto:
“Nos a duna Prome Minister algun idea concreto caba, con nan por crea mas fondo; crea un fondo pa deporte, banda di e presupuesto normal di e ministerio, pero crea muy en particular un fondo unda cu COA y gobierno ta maneha e fondo conhuntamente, manera ta e caso den otro paisnan den nos region, y caminda cu nan por haci mas cos posible for di e fondo ey.
Tambe nan a papia riba e posibilidadnan cu tin pa deporte haci Aruba un destinacion deportivo, unda cu Aruba ta un pais cu hopi hende kier bishita, pero e ta mucho chikito pa soña pa organiza weganan olimpico, tampoco weganan panamericano, ni weganan centroamericano y di Caribe, ni weganan Odesur, pero si por organiza campeonato na un forma excelente, y COA a duna idea di cierto eventonan cu nan kier organiza na Aruba, y pon’e riba mapa como un destinacion deportivo.
E dama a acentua cu Aruba por beneficia di dje, turisticamente, deportivamente y economicamente.
Hoevertsz a agrega cu tambe a papia cu Formador tocante e posibilidadnan economico. Deporte rond mundo ta un industria no miyonario pero biyonario, y na Aruba nos no ta ni “screeching the service” di tur e posibilidadnan cu tin awendia pa hende profesionaliza den dje, biba di dje, y haci un bida economico for di dje, y eynan COA ta kere cu hopi cos ta posible.
E tema di infrastructura di deporte tambe a bin dilanti. Nicole Hoevertsz ta splica: “Nos ta kere cu eynan nos tin un bon infrastructura basico, pero mester enfoca riba mantencion di infrastructura y percura tambe pa e infrastructura di deporte cumpli cu e rekisitonan di e federacionnan internacional. Nos ta kere tambe cu ta importante pa e acceso na e facilidadnan deportivo mester keda facil pa e federacionnan. Awendia e costo di huur di un facilidad ta asina halto, cu e desaroyo di un deporte ta wordo stroba, pa motibo cu e federacionnan, simplemente, no por paga e huur cu ta wordo cobra pa use”, Nicole Hovertsz a subraya.
