*Grupo di Tambu di Curacao lo bin celebra nan 50 aniversario na Aruba
ORANJESTAD (AAN) – Chico Harms, di Fundacion Chico Harms, den entrevista cu DIARIO a anuncia e actividadnan cu ta sigui despues di e Festival di Canto di Caya, cu lo tuma lugar e fin di siman aki, den Centro di Bario Brasil.
Augustus 17 tin e evento yama “Batacazo Tipico” unda tur esnan cu lo participa Diasabra awo, 27 di Juli, lo bin bek hunto cu otro gruponan, e lo bira un fiesta bailabel unda nan lo polish nan canticanan. Harms a bisa cu aña pasa e evento aki tabata tremendo.
Dia 24 di Augustus lo tin coronacion di Reina Folklore Cultural pa cual nan ta cla cu ocho categoria y otro aña si tin eleccion di Reina, pa celebra 15 aña di existencia. E lo bira un anochi hopi bon hinca den otro. Despues lo sigui pa dia 30 cu tin e parada cu linterna cuminzando pa 7’or di anochi. Dia 31 tin e show di tambu, manera pa varios aña tin’e caba, pero e aña aki ta bin un grupo di baile di Curacao, cu ta bin celebra 50 aniversario aki na Aruba.
“Conhuntamente cu e gruponan di baile di Aruba, nos lo tin un anochi di tambu y baile. Kiermen e lo ta hopi bon aunke ta tuma un anochi pisa riba otro, caminda nos ta prepara pa Diadomingo cu nos ta habri nos tentnan y nos tin mas cu 20 tipo di cuminda crioyo, sigur bon hinca den otro; bari y cushina bon surti. Despues, pa 3 or lo sali cu e para Folklore riba e mesun ruta. Por bin un cambio chikito, depende di September cu ta un luna hopi cayente mes, y manera aña pasa nos a cambie pa mey ora despues. Si tin un cambio lo ta chikito pasobra nos mester drenta cierto oranan bek”, Chico Harms a relata, concluyendo cu Dia 1 di September, e ultimo actividad lo tuma lugar.
