Kico por spera di e compania cu ta entrega gasolin na Aruba? --- *Vladimir Putin lo haci su parti den Citgo na Merca efectivo? --- *Biden y Maduro a papia di e baca di lechi den man di Guaido?
ORANJESTAD (AAN) — Pakico na un momento culminante na mundo, den e peliger di un Guera Mundial cu ya a hala su prome rosea, Presidente di Merca ta manda un delegacion papia cu e enemigo grandi di Merca cu yama Maduro?
Un pregunta cu no tin contesta, aunke diariamente un motibo nobo ta mira luz, solamente pa haci e pregunta mas grandi.
Na prome momento a wordo bisa cu Merca a bay busca petroleo na Venezuela despues cu Rusia a laga Merca sin petroleo. Ayera a bira conoci cu for di siman pasa ya Colombia a bisa Merca, cu e por entrega petroleo na Merca.
Despues a bini dilanti cu Merca a papia cu Venezuela di e ehecutivonan di Citgo, cu a wordo tira den prison di Venezuela, caminda Nelson Martinez a muri.
E gran logro tabata cu solamente dos di e seis personanan cu Nicolas Maduro a tira den prison, a mira luz di libertad pa bolbe Merca.
E tercer punto cu a bini dilanti ta, cu Venezuela lo tene eleccion pa dicidi kende ta Presidente di Venezuela. E punto aki tin nos mayor atencion pasobra e ta duna nos e certeza cu sigur e no tabata e punto cu ta pone cu den un tension internacional, porfin Presidente di Merca ta manda un representante bay regla eleccion na Venezuela.
Importante a keda e interes di Chevron, e compania petrolero di Merca na Venezuela cu no tin permiso pa amplia su negoshi y hustamente ta lucha pa esaki.
Ora papia di Chevron imediatamente mester papia tambe di Citgo, cu ta e compania di Venezuela na Merca.
Citgo ta e compania cu ta entrega gasolin pa Aruba y casi a bira e pilar economico grandi di Aruba, si e tambe no a cay den problema.
Ora nos analisa y sigui analisa e bishita Mericano na Venezuela, nos ta puntra nos mes si Merca y Venezuela no a papia di Citgo, cu Merca a pone den man di Guaido pasobra segun Merca y paisnan liber, ta Guaido mester ta Presidente y no Maduro cu Merca kier tira den prison.
Awor unabez Merca tabata na Venezuela pa papia di loke nan a papia pero te ainda nos no por comprende, e pregunta ta si Merca a puntra Venezuela si a tuma medida pa evita cu Vladimir Putin ta dicidi cu e ta ehecuta e borg cu e tin.
Kico esaki ta nifica?
Vladimir Putin por exigi pa pidi Huez pa permiti e haya su placa dor di benta di su accion den Citgo of exigi Venezuela pa paga e debe si Venezuela no kier pa e haci uzo di su borg y bira propietario di casi mita di Citgo.
Maduro a pidi Merca pa debolbe su baca di lechi cu Merca a pone den man di Guaido?
Kende ta stroba un transaccion di e indole aki? E Presidente Mericano cu mester duna permiso pa Chevron por haci negoshi na Venezuela pero tambe tin Citgo den su man pa evita cu Citgo ta wordo bende.
Ora nos analisa y sigui analisa tur loke ta na wega, nos ta puntra nos mes un que otro. Citgo ta produci petroleo? Cu kende Citgo ta bende petroleo na unda?
Na Aruba gasolin ta bini di Citgo. Y na Merca?
Nos lo sigui analisa e situacion y nos lo sigui vigila kico mas por a wordo papia durante e combersacion tan importante na Caracas, Venezuela, capital di Rusia na America Latino!
