Prijs nobo ta drenta na vigor 1 di December
ORANJESTAD (AAN): Bob Angela cu ta forma parti di e chauffeurnan di autobus a duna di conoce cu tur cos ta cla y entrante 1 di December nan lo hisa nan tarifa cu 1 florin.
El a bisa cu tur cos a yega na su fase final y pesey nan ta anuncia cu nan cuminsa cobra 1 florin mas dia 1 di December. Legalmente tur cos ta cla pero nan kier cuminsa prepara e usuarionan pa dia 1 cual ta e fecha cu e tarifa nobo ta drenta na vigor.
El a indica cu nan a keda cla cu gobierno pa loke ta e negociacion aki. Nan costo di haci negoshi aworaki ta hopi halto. Un servicio di bus ta cay entre 350 pa 375 florin, depende e marca di e vehiculo. Asina por sigui menciona tur otro prijs di parts.
Nan ta kere cu beneficionan secundario ta mas mihor cu aumento ya cu ta pueblo ta bay pagu'e, a remarca. Ta compronde pa gobierno cu tin ley, pero gobierno tambe tin cu compronde nan situacion, a sclama.
Angela a sigui bisa cu e florin aki a muri na caminda caba. Pero e ta kere cu mester sinta cu gobierno pa wak nan BBO completo, AZV, AOV, nummerplaat. A opina cui mester por tin boluntad pa asina por tin cambio.
E ta kere cu nan aumento ta hustifica, pero lo ta mihor si nan ta haya beneficionan secundario unda no ta pone presion riba e pueblo.
Bob Angela ta kere cu e aumento aki ta bon pa un temporada di 6 luna unda cu nan ta bay sinta analisa e situacion.
Na Aruba aworaki tin un total di 140 autobus. San Nicolas so tin 67.
