Pa ultimo biaha - ORANJESTAD (AAN): Diasabra awo dia 12 di juni 2021 DVG lo ta vacunando un cantidad grandi di persona cu durante vacunathon
edicion nr 2 a busca nan prome vacuna y tambe tur esnan cu a haya e prome vacuna mas cu 3 siman atras of riba dia 23 di mei.
Esaki ta e motibo pakico diasabra awo dia 12 di juni Centro Libertador Betico Croes na Santa Cruz y Teresita Center na San- Nicolas lo ta habri atrobe durante henter dia for di 9:00 di mainta te cu 4:00 di atardi ‘non stop’.
DVG ta warda tur persona cu durante vacunathon edicion nr 2 a pasa busca nan prome vacuna, pa acudi atrobe pa busca nan di dos vacuna diasabra awo.
Riba e dia aki tambe lo tin e posibilidad pa esnan cu ainda no a vacuna pa simplemente “walk In” y ricibi nan prome vacuna di Pfizer ainda.
Esnan cu por vacuna ta:
-Ciudadanonan di 18 aña of mas
-Hobennan di 16 of 17 aña cu condicion di salud
-Hende muhe na estado of cu ta duna lech’i pecho
-Ciudadano indocumenta cu estadia mas largo cu 6 luna riba Aruba
-Ciudadano cu permiso di trabou, stage of asilo politico
Na e momentonan aki Aruba tin un total di 64.990 ciudadano ya caba vacuna cu ta representa mas cu 65% di nos ciudadanonan di 18 aña of mas.
Mirando e reduccion drastico den casonan activo y e reduccion den e plamamento di e virus, DVG ta sigui haci yamado na esnan cu ainda no a vacuna por yama na number 280-0101 of registra via Aruba Health App of www.dvg.aw pa asina ricibi un cita pa vacuna.
E virus no a somenta, e tey y nos tin pa sigui lucha contra su transmision.
