Anneke Nicolaas, Fundador:
*Gradici cu tur famia di crianza pa brinda hogar na diferente mucha
ORANJESTAD (AAN)—Anneke Nicolaas, Fundador di Centro Famia di Crianza Arubano, den entrevista cu DIARIO a splica kico tabata e meta pa cual e Fundacion aki a lanta, 20 aña pasa. Kiermen, e Centro ta cumpliendo 20 aña di existencia, cumpliendo cu un labor sumamente noble.
Señora Anneke a indica cu 20 aña pasa nan tabata cu seis organizacion cu ta Imeldahof, Casa Cuna, DAS, Voogdijraad, Centro Orthopedagogico, Fundacion Guia Mi, y nan tur tabata busca famia pa nan mes; pero e preparacion y guia tabata tarda hopi y door di esey nan a purba hunto pa lanta un organizacion, y esey a bira Centro Famia di Crianza Arubano.
“Mi ta gradici hopi e Famianan di Crianza, pasobra e ultimo 20 añanan nos a logra yuda hopi mucha haya un cas y esey ta algo hopi bunita”, señora Nicolaas a expresa, y a agrega cu e centro semper ta keda un reto vooral pa e muchanan mas grandi. “E babynan semper ta logra, pa e muchanan mas grandi ta mas dificil y nos ta kere cu nan tambe mester di un hogar y amor di un famia”, Anneke Nicolaas a acentua.
El a menciona cu mayoria di e muchanan aki ta bay bon, pero semper den bida tin mucha cu no a logra. “Nos mes ta sigui busca famianan, y awo nos ta pidi Maria yuda nos den nos reto, pasobra nos mes tabata tin nos facebook page, pero hopi biaha no tin e profesionalismo pa ataha mas hende y cu esey nos kier haya ayudo aworaki”, señora Nicolaas a bisa. E ta kere cu e centro mester haya yudanza tambe di comunidad, y tur mester traha hunto pa soluciona, pasobra tin hopi problema na Aruba, cu mester di solucion.
Señora Anneke Nicolas a expresa palabranan di danki pa e famianan di crianza, pasobra sin nan, e Centro di Famia di Crianza lo no a existi y hopi mucha no lo a haya un chens den bida manera nan ta haya awo. “E importancia di un famia ta algo hopi grandi. Internadonan ta bon, ta bon cu nan tey, pero e amor y ambiente familiar bo ta haye solamente den un famia”, directora di Centro Famia di Crianza Arubano, a señala.