Reunion Foro Economico Mundial ta inicia awe den un futuro insigur
*India como di cinco poder economico mundial enfrente realidad nobo
*Mas cu nunca tur ciudadano mester aporta na proteccion economia local
ORANJESTAD (AAN)—Mundo ta prepara pa Carnaval, cu na cierto paisnan Europeo, paisnan na continente Americano y sigur region di Caribe, ta entrega hende un temporada di gozo y alegria manera Aruba tambe conoce.
Sinembargo, mientras e musica y alegria di Carnaval ta yena aire, uno di e situacionnan mas serio cu mundo a conoce a evita na tanto momento, ta presenta su mes den e sonido di guera na Medio Oriente y ta fortifica e inseguridad na Ukraine.
Siman pasa DIARIO a relata e informacionnan di Fondo Monetario Internacional, cu a mustra cu e situation di desastre economico cu a wordo pronostica pa 2024, lo no materialisa pasobra mundo a soporta e shocknan mihor cu a pensa.
Sinembargo, a wordo adverti cu e situacion mundial di guera y mas guera no ta nada alentador.
A wordo mustra cu mas informacion lo wordo duna durante encuentronan den cuadro di e Foro Economico Mundial, cu awe ta haya su inicio.
Mientras lidernan mundial ayera tabata acudi na e reunion na un mundo cu segun pronosticonan ta prepara pa problemanan serio cu Inteligencia Artificial lo nifica pa mundo labor na nivelnan mediano, e situacion mundial tabata bira cada rato mas alarmante.
A yega e momento cu e Ministro di Relacionnan Exterior di India a anuncia cu e lo biaha pa Iran, e pais cu lo ta sostene e gruponan rebelde di Houthi cu ta ataca barconan cu biaha den Lama Cora.
E bishita ta tuma lugar un luna despues di e atake cu drone riba un barco den awanan di India, tras di cual segun Merca, mester busca Iran.
Ora analisa loke ta pasa mundialmente, no mester mishi cu e berdad cu hende mester di momentonan pa relaha sigur despues di un tension cu for di inicio di e pandemia Covid-19 a trece tanto cambio na mundo.
Sinembargo, mester lansa advertencia serio tambe den un crisis mundial di un tamaño cu mundo a trata di evita for di momento cu a alcansa un acuerdo pa pone na Segundo Guera Mundial, cu te awe tin su resultadonan.
Na Davos awe ta cuminsa e reunionnan caminda lo discuti kico lo pasa cu economia mundial, cu ta enfrenta peligernan y situacionnan sumamente serio.
E necesidad pa atende debidamente cu e salida di petroleo ta uni su mes na e necesidad pa mundo conoce un tempo di paz, cu na ciere di e dia di ayera, tabata parce mas leu cu nunca.
E resultadonan lo ta hopi serio pa mundo, cu ta mira trafico maritimo na Medio Oriente completamente tranca loke ta haci cu productonan no por yega nan destinacion y asina ta afecta economia mundial pero tambe e articulonan cu no por yega nan destinacion, loke lo tin impacto enorme riba comercio internacional cu a wordo paralisa dor di Covid-19 na 2020.
Na e momentonan aki India ta wordo reconoci como e tercer pais economicamente poderoso na mundo despues di un crecemento economico historico den cual trafico maritimo a ocupa un lugar sumamente importante.
Por ehempel, na momento cu e Canal di Suez a wordo habri, e distancia entre India y Europa a wordo reduci cu 7 Mil kilometro cu lo mester a wordo cubri si a sigui otro ruta entre India y Europa.
Teniendo cuenta cu e lugar cu India ta ocupa actualmente den economia mundial, mester realiza loke ta na peliger na un mundo, caminda guera ta destrui economianan cu ta necesario pa progreso economico di mundo di cual bienestar di e hende ta depende.
Na mes momento inseguridad ta afecta e trankilidad cu hende mester pa por sigui traha riba su futuro, cu awe lo wordo mundialmente discuti na e Foro Economico Mundial na Davos.
E situacion ta guera ta presenta su mes na momento, cu manera DIARIO a anuncia, mester tene na consideracion cuanto trahador cu preparacion mediano, lo wordo afecta pa e resultadonan di introduccion di Inteligencia Artificial.
Si un pais manera India, cu ta e pais number tres riba lista di importadornan di petroleo y number cinco riba e lista di paisnan economico mas grandi na mundo, ta enfrenta un peliger serio, mester realisa e berdad actual di mundo.
Na e momentonan aki Aruba ta drenta su epoca di Carnaval. Mas cu nunca tur ciudadano mester aporta, na mantencion di un situacion cu ta sostene economia di Aruba y ta evita tur loke por causa impacto negativo economico pa e pais.
Aruba den epoca di Carnaval ta conoce su periodo importante di economia, cu den e actual situacion mundial mester di sosten.
