*Ban celebra y contribui na un bon causa
ORANJESTAD (AAN): Presidente di Heritage Center Club Boneriano, señor Gregory Goedgedrag ta invita pueblo henter pa celebra Dia di Boneiro diadomingo awo, 14 di september na Centro di Bario Dakota. E celebracion grandi aki ta cuminsa mainta di 9:30 cu un acto protocolar na unda lo ta presente e Gezaghebber di Boneiro, diputadonan y representantenan di diferente departamento. Di Aruba varios mandatario lo ta presente y varios director di departamentonan.
E actividadnan lo cuminsa merdia na Centro di Bario Dakota cu ambiente musical ameno di bandanan di Aruba y di Boneiro. Lo tin bendemento di cuminda crioyo y multi cultural na gusto di tur publico. 5or di atardi lo cuminsa cu e parada di Simadan di dos ora cu lo pasa den diferente caya den Dakota. Clausura di e celebracion lo ta di 7-9 na Centro di Bario Dakota.
Señor Goedgedrag a remarca cu un meta di e celebracion aki ta tambe pa recauda fondo pa sigui cu renobacion di Club Boneirano na San Nicolas.
