Mañan dia 2 di December:
ORANJESTAD (AAN)-- Misha Ras director di CEDEHM (Centro di Desaroyo pa Hende Muher) a duna di conoce den un conferencia di prensa, cu nan ta invita henter pueblo pa un Bazar di Pasco cu lo tuma lugar mañan, Diabierna 2 di December, di 6’or di atardi pa 10 or di anochi na FMA Paradera, parti paden.
Ras a menciona cu esaki ta un colaboracion entre MFA y CEDEHM. “Nos ta kere di ta presente den bario, di ta presente caminda nos hendenan muher ta, pues nos ta encurasha nos pueblo di Aruba completo, nos hendenan muher pa bin na e bazar di Pasco aki. E ta dunando oportunidad na nos hendenan muher pa bende nan obranan creativo y loke nan ta cushina, cosnan cu nan ta lora nan man cune. Pues, e ta un oportunidad grandioso cu nos di CEDEHM ta haya for di FMA y nos ta gradici nan colaboracion”, Misha Ras a indica.
El a agrega cu ta bay tin musica, cuminda sabroso, algo di bebe, un momento ameno, y e ta invita comunidad cordialmente pa ta presente. E ta reitera cu e fecha ta Diabierna 2 di December awo, di 6’or atardi pa 10 or di anochi, na MFA Paradera.
Misha a menciona cu tin algun lugar ainda habri, y esnan cu ta interesa por manda un mensahe p'e via e Facebook Page di CEDEHM, anto nan ta acomoda nan.
