Abogado ta haya cu mester persigui e agente di Polis cu a coy su arma y menaza di tira
ORANJESTAD (AAN): Via video conference cu Hulanda, Corte di Husticia a trata e caso penal cu Ministerio Publico a cuminsa contra e muher L.K. na Hulanda, kende ta wordo acusa cu dia 7 Mei 2019 a purba mata e agente di Polis homber T. door di hink’e cu cuchiu.
Fiscal ta haya L.K. culpable y a exigi un castigo combina. Abogado mr. Hart di L.K. a cuestiona e hecho cu Ministerio Publico mester a persigui e agente di Polis, T., kende a saca su arma y kier a tira L.K., kende tabata cu nan yiu den su man.
Den sala di Corte tabata presente agente T., kende a haci demanda di daño contra L.K. E hincamento a sosode tempo cu L.K. tabata bibando na Aruba cu T. y tabata studiando. E pareha tin un yiu homber kende tambe ta bibando na Hulanda.
MUHER A HINCA AGENTE CU CUCHIU: Hues a puntra L.K. si e acusacion ta berdad. Segun L.K. el a defende su mes contra T. y no ta asina cu ta un intento di mata. Hues a mustra cu segun relato di Polis. Polis a bay na e cas y mira T. cu tabata na sanger. El a bisa su colega Polis cu el a worde hinca pa su amiga. Tabatin un discusion cu a bay completo for di man.
Segun L.K. el a reacciona riba e forma con T. a grita nan yiu homber chikito cu tabata yora. A surgi discusion caminda L.K. a pasa man pa cuchiu ora cu T. a saca arma p’e y bis’e cu lo tir’e mata. Segun L.K. e no tabata sa mes cu el a hinca T. cu cuchiu.
Hues a bisa cu na Polis L.K. a bisa cu el a bay cushina y pasa man pa un cuchiu y bay riba T. cu tabatin un arma den su man y dirigi riba L.K.
Hues a bisa cu investigacion ta mustra cu e hincamento a sosode den camber. Segun L.K. e tabatin nan yiu den man ora tur cos a sosode. Hues a bisa cu T. a declara na Polis cu el a pone e arma un banda prome cu L.K. a hink’e.
DEMANDA DI DAÑO: Hues a mustra cu T. su demanda di daño ta 28.426 Florin. E suma segun T. ta encera e gastonan di abogado, 30 luna di no por a traha door di e hinca. Tambe el a haya castigo condicional pasobra a saca su arma y por poco a perde su trabao.
Aña pasa Augustus el a cuminsa traha back. El a bisa cu cada rato su tata tabata yud’e cu mas o menos 300 Florin. E salario cu tabata gana no tabata yega pa cubri gastonan.
Hues a remarca cu T. ta inclui casonan di alimentacion di su yiu, voogd, na Hulanda pero no ta mira kico esey tin di haci cu e caso di hincamento. T. a bisa cu si no tabata pa e hincamento, e lo tin bon contacto cu su yiu cu L.K. a bay cun’e Hulanda. Fiscal a bisa cu gran parti di e gastonan ta relaciona cu cuestionnan familiar na Hulanda.
FISCAL: Fiscal a bisa cu e ta haya cu L.K. a hinca T. cu cuchiu. E pregunta ta si L.K. mester a defende su mes cu cuchiu. T. a worde hinca den pecho y T. a perde hopi sanger. Fiscal ta haya cu L.K. a tuma riesgo cu T. por a muri door di e hinca. Fiscal a bisa cu e ta sospecha cu abogado lo bin cu defensa propio.
El a bisa cu ta un hecho cu T. a dal L.K. un scop na pia. Despues L.K. a bay coy un cuchiu den cushina. Ora el a bay den camber, el a mira T. cu e pistool den man. Fiscal a bisa cu T. tabatin e arma promer cu L.K. a bay den cushina. T. a warda su arma na momento cu L.K. a hink’e.
- no kier a haci denuncia contra L.K. pero mirando e seriedad di e caso a dicidi toch di cuminsa caso contra L.K. Fiscal a bisa cu e no ta haya cu por papia aki di defensa propio.
El a remarca cu gran parti di e gastonan ta un cuestion civil pa cu e separacion y no tin nada di haci cu e caso di hincamento. Fiscal ta haya cu no por inclui gastonan civil den caso penal. El a bisa tambe cu e cuestion cu T. no tin suficiente salario door cu no tabata traha overtime, no ta relevante. E gasto di un ticket pa Hulanda, algo mas di 1600 Florin, Fiscal ta haya cu por aproba y e resto no admisibel.
Fiscal a bisa cu ta trata aki di un caso hopi serio caminda L.K. a hinca T. cu cuchiu den pecho. Normal ta castigo di prison mester exigi pero L.K. a worde laga liber y el a bay biba na Hulanda. Fiscal a exigi castigo condicional esta 189 dia di prison di cual 180 dia ta condicional cu un tempo di prueba di 1 aña. No ta necesario bay L.K. bay sera. Tambe Fiscal a exigi pa L.K. paga e mas cu 1.600 Florin di daño.
ABOGADO: mr. Hart a bisa Hues cu e ta sigui e punto di bista di Fiscal pa cu demanda di daño pero ta haya cu hasta e ticket pa Hulanda mester keda afor.
E abogado ta haya cu no tabatin ningun motibo cu T. no por a viaha. E por a bay keda cerca su ruman muher y mas ainda mira su yiu homber.
VIOLACION DI PROCESO: E abogado a bisa Hues cu e ta haya cu tin violacion di proceso. E ta haya cu ta LandsRecherche mester a investiga e caso aki mirando cu T. ta un agente di Polis. Segun e abogado, a laga Polis haci investigacion y ta haya cu T. a gaña kico realmente a pasa.
Na opinion di e abogado mr. Hart, tur cos a cuminsa door cu T. a dal L.K. un scop. El a remarca pakico no tabatin un caso contra T. pero L.K. si. Despues di 2 aña y 4 luna ta bin cu e caso aki. E abogado ta haya cu a viola e proceso normal y cu mester declara Ministerio Publico no admisible. Na opinion di e abogado, T. ta reconoce cu anterior a maltrata L.K. y hasta su yiu. E ta admiti tambe di a saca y arma su arma contra L.K.
Segun e abogado, tabatin problema den pareha pa basta tempo y a culmina den loke a sosode. T. a menaza di lo tira L.K. mata y L.K. a bis’e pa no haci’e dilanti nan yiu cu e tabatin den man. L.K. tabata sa cu si e pone su yiu abao, T. a tir’e. Pesey el a bay hinca T. cu e cuchiu cu su yiu den man. Despues T. a bay warda e arma. E abogado ta haya cu L.K. a actua den defensa propio y no por persigui’e. El a bisa cu si hay’e culpable tog pa Hues dun’e castigo igual na loke e tabata sera.
Fiscal a reacciona cu abogado ta pinta cos robez cu Ministerio Publico a trata e victima T. diferente cu e sospechoso. El a splica cu un departamento special a atende e caso y no Polis. LandsRecherche ta encarga cu otro tipo di investigacion. E caso aki ta diferente cu loke e abogado ta menciona. No a viola e proceso manera abogado ta pretende. Ta pesey a bay hopi amplio riba e caso y mester mira cu T. ta e victima. Fiscal no ta haya cu mester declara Ministerio Publico no admisibel.
Hues a sera tratamento di e caso y a bisa cu dia 17 Februari lo tin sentencia.
