Richella Dorothal di DTI:
*Percura pa tur documento necesario ta na ordo y vigente
ORANJESTAD (AAN): Pa varios aña caba, Dienst Technische Inspecties (DTI) ta trahando estrechamente cu Cuerpo Policial Aruba (KPA) riba diferente comision relaciona cu siguridad, incluyendo control di UTV y otro vehiculonan. DTI ta enfoca principalmente riba asegura cu propietarionan di vehiculo cumpli cu e obligacion di keuring y cu nan tin e documentacion corespondiente disponibel durante controlnan di trafico.
Richella Dorothal di DTI a splica cu regularmente ta wordo manda recordatorionan na clientenan registra den e sistema di DTI. Sin embargo, no tur vehiculo ta registra den e sistema, resultando cu algun propietarionan no ta recibi notificacion cu nan fecha di keuring ta cerca di caduca. Dorothal a indica cu DTI ta trahando riba plannan di digitalisacion pa modernisa y facilita e proceso di pidi cita, maneha registro y manda recordatorionan automatico.
Segun Dorothal, e cumplimento cu e obligacion di keuring ta keda atras compara cu e di seguro di auto. Esaki ta resulta den situacionnan unda vehiculonan ta circula sin un keuringskaart valido y, den cierto caso, tambe sin un seguro vigente. El a enfatisa cu tanto keuring como seguro ta documentonan esencial, specialmente den caso di accidente of otro incidente riba caminda.
Pa loke ta trata vehiculonan manera UTV y V-Car cu tin permiso di Departamento di Transporte Publico (DTP), Dorothal a agrega cu DTI ta mantene un colaboracion continuo cu DTP. Regularmente, DTI ta comparti informacion tocante vehiculonan, personanan y companianan cu no tin nan keuringnan vigente. Ademas, DTI ta encarga di keur un parti significativo di e flotanan di companianan di huur auto y otro empresanan cu ta maneha cantidad grandi di vehiculonan, coordinando fecha di inspeccion pa facilita e proceso.
Finalmente, Dorothal a enfatisa cu, aunke cu DTI ta sigui fortalece y modernisa su servicio, e responsabilidad final ta riba cada ciudadano propietario di vehiculo. No spera pa un recordatorio, controla bo fecha di keuring. Cada ciudadano mester ta consciente di nan obligacionnan y asegura cu tur documento necesario ta na ordo y vigente.
