ORANJESTAD (AAN) – Minister di Finanzas y Cultura, Xiomara Maduro, a hiba palabra durante e conferencia di prensa yama pa Stichting Monumentenfonds,
relaciona cu e terminacion di e proyecto “Casco Restauratie” di e monumento situa na Steenweg-19.
Manera e director, señora Anne Witsenburg, a menciona ta trata di e edificio di famia Croes, y cu a wordo ocupa no solamente como cas di famia, sino como Botica Aruba y despues como Almacen El Mercado.
Minister Xiomara Maduro a expresa cu cada bez cu un edificio monumental ta wordo restaura na Aruba, nos como pais, como pueblo ta haya oportunidad di por conoce su historia. “Pues, un monumento ora e ta wordo restaura den su gloria, e ta conta bo su historia, y pesey awe cu placer mi ta akinan hunto cu Monumentenfonds, gradiciendo nan pa e trabao, pa su insistencia pa asina awe, Steenweg-19 wordo restaura den su gloria. E no ta cla ainda, manera cu a wordo splica; e casco (e pida pafo) ta drecha pero wardando esun cu ta wordo inspira pa drenta akiden, pa huur e edificio aki”, e dignatario a menciona.
El a agrega cu ta un edificio cu su seyo di proteha, pero cu su historia special. “Cu esaki tambe e invitacion ta, pasobra poco, poco por mira ora cu restaura otro edificionan y, tambe esnan den man priva, ta haya e smaak, pa asina por haya renova tambe esnan di nan. Sigur ora nos ta aki ariba nos ta tira bista na e edificio dilanti, cu un tempo tabata wordo uza pa SVb y nos lo ta hopi contento si un dia tambe e doño lo kier yuda nos den conserva e historia di nos pais”, Minister Xiomara Maduro a señala.
E dignatario a subraya cu su curazon tin gratitud pasobra un otro monumento ta wordo scapa di bira deteriora. El a bisa cu e sa cu tin hopi mas edificio cu por yuda restaura, pero e fondonan hopi biaha no ta facil pa yega na nan, pero den esey Monumentenfonds a bin ta haci un trabao ya pa 25 aña caba, pa asina percura pa e monumentonan den nos pais, conta nan historia. El a gradici Monumentenfonds y tur cu tabata envolvi den e fase aki di restauracion, manera e arkitectonan, e constructornan, etc. El a conclui expresando su deseo pa pronto por conoce e huurdo pa e edificio na Steenweg-19.
