Smartcard escolar por pidie y pag'e online:
ORANJESTAD (AAN) – E relacionista Publico di Arubus NV, Sannin Daou a anuncia e siguiente cambio den orario di servicio di Arubus, dentro di e situacion di pandemia di Covid-19.
Daou a splica cu entrante Diadomingo 5 di September, Arubus lo core cu un schedule nobo. El a menciona cu tur usuario cu ta uza e servicio di Arubus sa, cu na inicio di e pandemia Arubus mester a adapta su orario riba Diadomingo, locual nan ta yame e “Schedule di Diadomingo”, cu ta core pa mas cu un aña caba. Esaki a duna e compania un espacio pa haci cambio den e dienstnan, y e ora ey nan a bin cu un cambio di orario completamente nobo, cu ta bay cuminza Diadomingo awo.
E vocero di Arubus a menciona cu riba Diadomingo lo no tin tanto cambio, compara cu loke tur hende ta custumbra cune, pero den siman si lo tin varios cambio cu lo haci cu e servicio ta bira hopi mas efectivo, mas na ora locual ta bon pa nos usuarionan.
Sannin Daou ta invita tur hende pa bishita e website di Arubus, unda tur e cambionan aki ta aparece. Den e “routes schedule” tin dos escogencia. E usuario por scoge entre e ruta actual of e rutanan nobo.
E ta aclarea si, cu e cambionan ta solamente riba horario, no riba e trayectonan cu Arubus ta core, cu ta semper riba camindanan principal. E kier ta duidelijk cu e cambionan aki ta cuminza Diadomingo 5 di September awo.
Tabata un custumber cu e prome bus di Arubus ta cuminza core pa 4.55 or di madruga, pero pa peticion a haci un adaptacion chikito di cinco minuut prome, kiermen e ta bira 4.50 or madruga. E meta di a haci cambionan di horario, ta pa conecta miho San Nicolas cu Playa y Playa cu area di hotel.
Un biaha mas Daou a pidi tur e usuarionan di Arubus pa tira un bista riba e website, ya cu tur informacion cu ta schedule actual y schedule nobo, ta online. Esaki pa ta na haltura ki ora e usuario mester subi bus, pa no yega su trabao laat. Tin basta espacio awe ainda pa tene cuenta cu e informacion. Tambe ta asina cu a agrega dos ruta cu ta school 13 y school 14 y tambe e descripcion di e ruta ta riba website. E informacion ta masha facil pa haye, Daou a bisa. Riba e dienstnan normal no a haci ningun cambio.
Daou a señala cu Arubus, pa aworaki, no ta bay habri rutanan nobo, kizas den futuro pero esaki ta algo cu mester studia y planifica bon. En todo caso, no por lo pronto.
El a reitera cu Arubus ta core, manera semper, riba e rutanan mas transita. Den e oranan peak mainta, merdia y atardi pa anochi tin mas bus den servicio, y den e oranan mas trankil tin menos.
Finalmente, e vocero di Arubus, mirando cu aña escolar a habri recientemente, por pidi e smart card online y paga online tambe, despues busca e carchi na un di e oficinanan.
