Segun Erwin Lopez, director EPB Oranjestad:
*Ademas cu aya nan ta wordo hopi miho paga!
ORANJESTAD (AAN) – Mundialmente, e trabao di docente no ta mucho “intrek” mas, segun señor Erwin Lopez, director di EPB Oranjestad. Lopez a subraya cu si weita na Hulanda mes, tin un scarcedad di mas di 10 mil docente. Bay busca docente na Hulanda no ta un opcion mas pasobra no ta haya, y ademas aya nan ta paga hopi miho cu Aruba.
El a agrega cu nos hobennan ora nan caba di studia nan tin un monster di debe di mas di 100 mil florin.
“Nan ta prefera di keda na Hulanda, traha, paga na euro cu bin Aruba bin pag’e den florin. Esey ta hugando un rol. Nos tin hopi pa haya docente vooral den techniek, y coki ta un problema, pasobra pa un coki bin traha akinan, pasobra den un hotel e ta gana dos biaha mas hopi.
Esey ta un reto cu nos tin man na curazon pa hotelnan no bin horta nos cokinan cu ta duna les, pa bay traha den hotel pasobra dia di mañan no tin coki pa bin duna les akinan.
“Den ICT Opleiding mesun cos. Un bon ICT ta gana hopi mas cent den negoshi cu ta gana na scol. Consecuentemente, esnan cu tey realmente ta duna les. Nan kier duna enseñanza, pero tentacion ta bira grandi na cierto momento, pasobra si bo ta bon den bo trabao nan ta haya sa, y nan ta bin busca bo”, cabesante Lopez a señala.
Esaki ta un reto cu scol no por cumpli cu ne, pasobra salarionan na Aruba ta fast, kiermen scol no tin maneho riba esey.
Pa bira un docente na EPB, en principio e persona mester tin un diploma HAVO y un PDG.
“PDG ta wordo duna na Aruba, y esey ta e papel pa bo duna les. Si bo tin un HAVO diploma, acerca nos, bo por cuminza traha cu dispensacion di Minister y Inspectie, y mientras tanto bo ta bay scol bek pa un of dos aña, riba diasabra, pa bo PDG y bo bira un leer art”, meneer Erwin Lopez a indica.
Cabesante señor Lopez a bisa cu, eigenlijk, e persona mester tin amor pa e trabao, cu no ta facil pero ta hopi dushi.
“Henter dia bo ta traha cu mucha. En principio abo ta mishi cu e futuro di Aruba, pasobra loke bo haci awe, aki diez aña bo ta waknan cana eyfo, y nan ta e futuro di Aruba”, meneer Lopez a indica.
