Funcionario Francis Toussaint:
ORANJESTAD (AAN): Awe cu ta celebracion di Dia di San Juan y Dera Gay, señor Francis Toussaint di Brandweer Aruba ta haci un apelacion na comunidad pa celebra e tradicion di un forma responsabel y sigur. Segun e, e deseo principal di Brandweer Aruba ta pa reduci e cantidad di candelanan e aña aki, compara cu e 72 incidentenan relaciona cu San Juan y Dera Gay cu a wordo reporta aña pasa. Segun Toussaint, pa logra e obhetivo aki ta depende di cooperacion di comunidad.
E ta encurasha pueblo pa participa den e diferente celebracionnan organiza door di e diferente clubnan, centronan di bario y otro organizacionnan rond di Aruba, compartiendo e tradicion hunto cu famia y amistadnan mientras ta preserva e herencia cultural di nos isla na un manera sigur.
“Dia di San Juan y Dera Gay ta un celebracion di cosecha y no un dia pa comete vandalismo y cende candela pa loco y tur caminda”, señor Toussaint a expresa. Segun e, aña pasa tabatin candela grandi cu a bay for di man na unda cu a dura varios dia pa Brandweer Aruba paga e candela, y esaki a causa hopi molester pa e becindario.
Pa responde rapidamente na eventualidadnan, Brandweer Aruba a fortalece su preparacion operacional. Awe lo tin siete truck di bombero disponibel riba caya, acompaña pa cuatro vehiculo di refuerso cu lo evalua y atende e incidentenan di mas urgencia prome cu e trucknan grandi wordo mobilisa. Ademas, Central di Alarma ta reforsa cu personal adicional pa procesa y coordina yamadanan di emergencia.
“Brandweer ta ekipa awe riba dia di San Juan y Dera Gay. Nos tin tur logistica in place”, el a duna di conoce.
Apesar di e preparacionnan extensivo, Brandweer Aruba ta urgi comunidad pa aporta su parti pa preveni incidentenan y ta recomenda pa mantene rond di cas limpi, evita acumulacion di material inflamabel y, si ta cende un candela, semper tene cuenta cu direccion y forsa di biento pa evita cu e candela por crece sin control.
Pa cualkier emergencia relaciona cu candela, comunidad por yama 911. “Brandweer semper ta cla y bon ekipa pa brinda asistencia na unda cu tin necesidad,” Toussaint a conclui.
