ORANJESTAD (AAN): Recientemente Guardacosta di Caribe Hulandes a haya informacion cu un boto ta yenando cu awa y cu supuestamente tin 2 hende abordo.
Capitan di e boto a bisa cu e ta entre Saba y St. Maarten, y cu el a haya problema cu motor.
Rescue Coordination Center di Guardacosta di Caribe Hulandes, cu tabata den contacto cu e Centro Frances na Martinique, a haya despues e peticion di Martinique pa bay rescata esnan den e boto debi cu esaki ya no ta safe pa nabega. Esey a pone cu Guardacosta a manda e cutter Poema rumbo pa e boto pa yuda e hendenan abordo. E capitan di e boto a bisa cu no tin ningun material di salbabida abordo, y cu nan mester di yudanza urgente.
E cutter Poema a mobiliza linea recto pa Saba pa duna asistencia. Ora cu nan a yega, e tripulacion di Poema a nota cu ya caba un boto mas chikito a cuminza duna nan asistencia y cu un cabuya a cuminza lastra nan. E ora Poema a tuma over e cabuya pa asina nan lastra e boto aki rumbo pa St. Maarten.
Pero ora cu e personal a cuminza investiga esnan cu ta abordo di e boto, nan a bin topa cu un total di 27 hende eyriba, posiblemente ilegal. Ora di yega St. Maarten, tanto e capitan y demas personanan abordo a wordo pasa pa Polis di St. Maarten pa nan sigui investiga.
