Salvador Franken: “Nos ta den temporada di broeimento di boa”
ORANJESTAD (AAN) – DIARIO a tuma contacto cu meneer Salvador Franken di Parke Nacional Aruba (Arikok), relaciona cu e hecho cu den e dianan aki hopi boa ta subi den cura di cas, y vooral si tin mondi nan ta sconde eynan.
Pero tambe riba caminda publico por mira cu tin boanan ta wordo mata pa auto cu a pasa riba nan, of pa hende cu ta corta nan cabes cu machete y ta tira e pidanan riba caya. Na Santa Cruz, por ehemplo, por nota esey na diferente area, aunke den tur e otro distritonan tin aparicion di boa.
Señor Franken a confirma pa DIARIO cu Parke Nacional ta haya hopi yamada pa busca boa cu un of otro habitante a gara na nan cura di cas y personal concerni ta bay na e adres pa gara e boa, hinke den hemchi, y bin Parke cu nan unda nan ta pone nan fria den un den un freezer.
Kiermen, na Parke Nacional nan no ta mata e boanan direct sino cu nan ta muri poco, poco, den silencio den e freezer. Den e procedure, cada aña ta bin expertonan di un Instituto na Merca, cu ta habri e boanan y nan ta investiga kico nan a come, di cual sexo cada un ta, y ta anota e informacion di henter e aña. Despues di esey, e restonan ta bay dump.
TEMPORADA DI BROEI:
Aunke no ta tur aña e boanan ta broei, nan tin nan temporada pa esaki. Precisamente aworaki ta un temporada di broeimento. Interesante ta, señor Franken a splica, cu nan ta haya entre 60 pa 90 yiu, pero e mama boa no ta retene nan yiunan, sino cu ta laga nan los, biba pa nan cuenta, y esey ta e motibo pakico tin tempo cu e boanan ta plama tur caminda na Aruba.
El a splica tambe cu e curpa di e boa tin dos matriz. Kiermen si tin 10 boa ta haya yiu, kiermen cu 20 boa ta nace, ta busca nan lugar pa establece y tambe ta broei na su momento y ta invadi Aruba. E boa por reserva sperma, di manera cu nan mes ta dicidi ki tempo ta broei.
Parke Nacional Aruba no ta conserva e boanan, manera tin hende ta kere. Solamente ta busca nan ora tin peticion y nan mester ta na bista y bibo pa nan gara nan. DIARIO a comenta na señor Franken cu den un cura cu mondi, den un cas na Santa Cruz un boa a sconde, y anochi por a scucha e lamento fuerte di un pushi, y despues di un rato silencio total. No a mira e pushi mas y e habitantenan ta asumi cu e boa a gulie. Señor Franken a splica cu e boa, prome cu guli un animal, ta strangula esaki y esey logicamente, a causa e keho desespera di e pushi. Tambe den e mesun bario varios galiña a disparce, y posiblemente nan a bira alimento pa un boa.
Finalmente, señor Franken a indica cu hende cu ta wordo mordi pa un boa no ta core peligro di wordo envenena y muri. Si ta asina cu como cu nan ta lastra nan tin hopi bacteria cu si por ta dañino pa un hende mordi pa boa y pesey na Hospital tin un angua pa evita cualkier infeccion.
DIARIO ta gradici señor Franken e informacion importante aki. Potret: cortesia di PNA.
