Astrid Britten, Directora:
ORANJESTAD (AAN): Astrid Britten, Directora di Biblioteca Nacional di Aruba a expresa palabranan hopi bunita dirigi na e staff cu a reuni diamars na George Madurostraat 19 pa celebra 75 aña di trabao di biblioteca na Aruba.
Sra. Britten a expresa: "Awe, 20 di augustus 2024, hunto nos ta para keto na e momento aki pa refleha. Setenta y cinco aña di conocemento y nos ta sigui conta…
The only limit to the height of your achievements is the reach of your dreams and willingness to work hard for them – Michelle Obama
E unico manera pa bo por alcansa bo logronan y pa realisa bo soñonan ta e boluntad y perseverancia di traha duro.
E quote aki ta enfatisa e importancia di educacion, traha duro y pa tin ambicion pa por realisa bo metanan.
No tin nada mas importante den bida di un ser humano cu ta educacion. Educacion ta cuminsa na cas y ta sigui na scol den forma formal y na un biblioteca den forma informal.
Permiti mi cita parti di e poema titula “Humildemente nos ta gradici” di Digna Lacle-Herrera, na ocasion di 60 aña trabou di biblioteca na Aruba: “…nos kier gradici Bo pa e privilegio di por labora hunto den harmonia y forma parti di e instituto aki, na unda tur dia nos ta cumpli cu e encargo cual nos a acepta y a tuma e responsabilidad di yuda, pa forma chikito y grandi pa medio di lectura y programanan educativo y cultural...”
Staf di Biblioteca Nacional Aruba ta forma un parti importante den esaki, tey pa tur grupo meta y Biblioteca Nacional Aruba ta e scenario unda hopi actividad comunitario ta tuma luga, tanto educativo, cultural y recreativo.
Nos personal ta motiva y ta traha cu dedicacion pa por aporta y duna contenido na trabou di biblioteca. Hopi agradecido tambe na tur, nos antepasadonan, cu a duna e fundeshi loke awe Biblioteca Nacional Aruba ta. Ta un privilegio pa mi por dirigi Biblioteca Nacional Aruba, un trabou cu mi a bin ta haci cu hopi amor y pasion. Dado momento nos lo no tey mas, pero nos biblioteca tey pa keda como un anker den nos comunidad.
Biblioteca Nacional Aruba ta un pilar prestigioso, esaki no ta simbolisa solamente nos coleccion, conocemento y cultura, pero tambe nos balornan y aspiracion comun. E ta e luga pa busca educacion, crecemento personal y rikesa intelectual. Pa generacionnan e ta e fuente di orguyo, pa empodera nos comunidad y ta e ambiente unda tur hende tin oportunidad igual, unda cu por studia, explora y prospera.
Banda di esey, Biblioteca Nacional Aruba ta un necesidad absoluto den un comunidad. E ta esencial, ta provee acceso liber na informacion, tecnologia y servicionan cu ta alcansabel pa tur hende. Nos ta promove lesamento y studia pa bida largo y nos ta duna aporte den combati analfabetismo y preserva nos herencia cultural y ta ofrece un espacio sigur unda tur hende ta bon bini.
Pabien cu celebracion di nos 75 aña na cada un di boso. Biblioteca Nacional Aruba su compromiso pa comunidad ta vital unda e tey pa asina por empodera tur hende, ta enrikece nos comunidad y ta percura pa tur hende tin un miho perspectiva. Trabou di biblioteca a nifica hopi y a haci un diferencia den bida di hopi hende. Setenta y cinco aña ta mas cu tres cuatro di siglo, e ta un testimonio di resiliencia, di crecemento y di conocemento. Laga nos apreci’e, cuid’e y protehe’e".
