DIARIO a adverti pa bobedad di streanan politico nobo na Hulanda
“Programkabinet” ta entrega Wilders e puesto di poder den Parlamento
*Opositornan di Wilders mes ta entregue e posicion pa e sigui crece
ORANJESTAD(AAN)—For di e momentonan cu Ronald Plasterk no a logra yega na un Gobierno pa Hulanda y asina tambe pa Reino, tabata visto cu formacion di un Gobierno Hulandes nobo, lo no ta facil.
Bobedad politico ta loke a resalta den e surgimento di personanan manera Pieter Omtzigt, cu ya for di prome cu eleccion a duna prueba di instabilidad y inconsistencia como lider.
Omtzigt, despues cu e partido BoerBurgerBeweging ya a entrega prueba di un ansiedad pa cambio na Hulanda, a sinti su mes ganador absoluto di e ultimo eleccionnan na Hulanda, cu a percura pa un sorpresa cu e surgimento di Geert Wilders, cu no ta un cara desconoci na Hulanda pero tambe e politico cu un direccion nacionalista, cu na e momentonan aki ta loke pueblo votador ta busca rond mundo.
Den e proceso cu a sigui despues di eleccion, por a mira cu Omtzigt a cuminsa hala atras pa cualkier responsabilidad cu e lo mester a acepta si e drenta Gobierno.
Ta increibel cu despues di eleccion el a tuma nota di e situacion financiero Hulandes, siendo politico activo na Hulanda. Mas ainda pasobra DIARIO mes a splica Aruba, kico tabata e realidad Hulandes.
Resultado di eleccion a entrega un demanda pa e partidonan derechista forma un Gobierno, cu segun candidad di voto, lo mester tabata dirigi pa Geert Wilders, a base di resultado di eleccion, cu sigur na Hulanda a refleho e deseo di Pueblo.
Despues di 100 dia a bira evidente cu no por a forma un Gobierno pero di un momento pa otro, ora ya mester a cuminsa pensa den direccion di un eleccion nobo, diripiente lo a logra un base pa forma un Gobierno.
Ta den e ultimo vuelta politico, e partidonan cu tabata contra Geert Wilders a comete e fayo politico mas grandi cu lo por pensa, yegando na un formula cu nunca a existi den historia di gobernacion di Reino, pero cu lo mester garantisa cu Geert Wilders, lo no bira Ministro Presidente.
Manera DIARIO a splica Aruba, formulanan nobo cu ta bay contra e concepto cu e decision di Pueblo pa forma un Gobierno na urna electoral mester wordo respeta, a wordo inventa pa e politiconan cu a logra yega na asina yama Parlamento extra Parlamentario, cu ainda no tin contenido.
Manera DIARIO a mustra, awor mester bay dicidi kico lo ta contenido di e formula aki cu ta e loke e informador Putters a entrega como su logro, cu realmente no ta un logra pasobra awor mester bay negocia, kico ta bira un Gobierno cu base extra Parlamentario.
Ademas a wordo dicidi cu ningun lider di partido, por ta parti di e Gobierno nobo, loke ta nifica cu asina nan a logra tene e ganador di eleccion, Geert Wilders for di gobernacion Hulandes.
Sumamente interesante ta e hecho cu e informador mes a trece dilanti cu e no por forma ni un Gobierno cu base mayoritario, ni un Gobierno cu base minoritario cu ta wordo “gedoogd” pues “tolera” pa partidonan den oposicion.
E unico forma pa a yega na un Gobierno lo tabata e Gobierno a base di un formula no existente y hasta desconoci, mientras si a dicidi cu ningun lider di partido lo ta den gobernacion cu lo bira un tipo di cuminda “mitar barata, mitar aroz” cu puestonan gubernamental reparti entre politiconan y no politiconan.
Pero, mester comprende cu no tin un formula ainda pa e Gobierno, loke ta nifica cu ainda e formacion no a yega na un conclusion.
E loke kier a logra tabata cu Geert Wilders no ta bira Ministro Presidente, loke ta loke e opositornan a pone nan dilanti pa ta den Gobierno.
Kico ta bobedad ta bini dilanti den e formula aki, pasobra awor Geert Wilders ta den e posicion pa mas cu nunca, cu forsa di su exito electoral, lanta para den Parlamento Hulandes y presenta su exigencianan cu e lo mester a realisa si el a haya e encargo di Prome Ministro.
E turbulencia na Hulanda, a cuminsa manifesta su mes ayeranochi. E mayoria di votadornan na favor di Wilders, ya a mustra cu nan no ta acepta un Gobierno sin Wilders.
Na e momento cu DIARIO tabata prepara pa bay imprenta, un situacion serio tabata surgi y mester wordo sigui pa Aruba, pasobra den e representacion politico den Gobierno di Hulanda, cu ta e representacion politico mayoritario di Gobierno di Reino, Aruba tambe tin asiento. Decisionnan ta wordo tuma pa Aruba tambe a base di Statuut!
DIARIO ta entrega prueba cu e no a bati alarma falso, ora el a splica for di 2023 kico ta e problema na Hulanda, cu dentro di poco lo por bolbe urna electoral!
