Anselmo Pontilius:
ORANJESTAD (AAN)-- Anselmo Pontilius, siguiendo cu e tema di 40 aña di Status Aparte, a reitera cu Aruba tin aworaki, mas of menos 110 mil habitante, di cual 20 mil ciudadano ta den edad riba 60 aña.
“Esaki ta un di e temanan cu ta toca nos, como pais pa atende. Pero nos a atend’e den cuater decada? E ta nifica cu awo ta un bon momento pa nos bin hunto, admiti kico nos a haci bon, menos bon, y caminda nos a faya.
Por ehemplo, Parlamento di Aruba no tabata suficientemente fuerte pa vigila gobernacion. Nos ta kere cu Parlamento mester a asumi y tin cu asumi, su rol mucho mas fuerte, y esey ta un di nos debilidadnan cu a conduci hopi biaha, cu nos no a cumpli cu tambe hopi biaha, cu nos no a cumpli cu cantidad di leynan; respet pa e Institucionnan cu ta duna bo conseho: Raad van Advies, Algemene Reken Kamer, pues Contraloria General, Banco Central y tur otro departamento di Gobierno cu t’ey pa duna bo conseho”, Anselmo Pontilius a señala.
Pontilius a subraya cu no t’asina cu, como gobernante, ora cu e conseho no ta cumbini e, politicamente, e ora ey bo ta bent’e den bari di sushi.
“No por! Kiermen, si bo ta falta respet pa e Institucionnan, bo organonan, consecuentemente tin consecuencia pa e pais.
Den 40 aña, unda nos ta awe cu educacion? Educacion di un pais...Kiermen con hopi bo ta keda inverti den educacion. Educacion di bo pais, ta tanto esnan cu ta bay scol inda, ainda, pero e comunidad cu t’aki afo. E comunidad cu ta trahando. Con hopi ta sigui eduk’e riba su derecho y su obligacionnan. Con nos ta cu nos cultura, Nos Idioma Papiamento, con nos ta sigui promove un balor incalculable di tin bo mesun idioma, y con bo ta fortalec’e. E seguridad den bo pais, den sentido cu e ciudadano unda cu e ta biba e por sinti cu bo por drumi anochi trankil, y cu e no ta hay’e cu problema anochi, ora e ta subi caya, etc.etc. Nos ta mira con e crecemento di vehiculonan riba caya y e iresponsabilidad cu tin, nos no por generaliza, pero ta asuntonan cu nos tin cu atende y di e miho forma y no warda te ora cosnan pasa”, Anselmo Pontilius a señala
El a agrega cu masha poco biaha nos ta para keto y bisa “Unda nos ta bay? Y eyden pa bisa “den e cuater decadanan aki kico nos a haci bon y kico nos a haci menos bon.
“E dañonan cu nos ta haci na nos naturaleza, e aumento di construccion no planifica, si un hende puntra cu nos ta cu e cumplimento di e ley di ROPV? Y nos lo bay na un otro etapa aworaki. Refineria ta un di e impactonan di ciere, y awo nos ta papiando di ruim up e refineria. Tur e posibilidadnan si of no di un segundo pilar di nos economia. Con leu nos ta envolve nos comunidad pa bisa, ‘Ok unda nos kier bay e proximo 10, 15, 20 aña nos dilanti?” Anselmo Pontilius a resalta.
