Solange Tchong, Vocero:
ORANJESTAD (AAN) – E Relacionista Publico di AZV, señora Solange Tchong, den entrevista cu DIARIO a bisa cu tur cambio den e maneho di AZV, ta rekeri tambe un impacto pa e pashent.
Tchong a señala cu e Ley di AZV semper ta bisa cu e remedi ta cuminza tuma lugar na Aruba. Na momento cu AZV duna aprobacion pa un asegurado sali bay Colombia, haya su cuido medico, cada biaha cu e sali bay bin bek AZV ta wak e como un caso separa di otro.
“Dus, un pashent cu a bay Colombia y bin bek aunke cu e ta un pashent bao tratamento, por ehemplo, di Hospital Internacional di Colombia, anto aworaki ta 2025, AZV ta puntrando tres otro clinica. E no ta ningun problema pasobra ora bo ta bin for di Colombia, cu bo specialista na Aruba tin cu tuma bo bek e ta bay sigui cu e tratamento, of ta specialista ta manda bo pa bo docter di cas na Aruba, pa por continua cu e tratamentonan necesario. Pero den principio unabes bo a bin bek, hasta t’asina cu si ta rekeri di un peticion nobo pa bolbe sali, e ora ey nos ta evalua e caso como un nobo”, Solange Tchong a splica.
El a agrega cu e experiencia ta un tiki diferente pasobra e pashent ta bay otro docter, no mesun cu e pashent a wak na Colombia, y dentro di e cuido AZV ta percura cu cada biaha cu drenta un peticion, e ta evalua esaki, y e pashent ta haya cuido medico.
Tchong a acentua cu e servicio ta importante, no obstante, via cual profesional den cuido medico e pashent ta hay’e.
“Pues si un pashent ta custumbra e ultimo dos of tres aña cu AZV a traha cu otro clinicanan, berdad t’asina cu ta bay tin e cambio awo. Bo lo tin cu haya bo kizas dilanti un specialista nobo, di Colombia. Pero kico pa nos ta primordial? Pa tuma nota cu, cu e servicionan ey bo ta conta y, hustamente, pasobra nos a bolbe evalua tur loke ta e servicionan medico cu ta wordo duna: e calidad, pa logisticamente tur cos ta bon organiza, etc. Esey ta nifica cu den principio e experiencia cu bo ta bay haya awo, di 2025 en adelante, ta suppose di ta miho di loke bo a haya te aworaki den pasado”, PR di AZV, Solange Tchong a señala.
