Pa esnan cu ta biaha pafo di Aruba:
*Ta bolbe recorda cu AZV ta cubri Aruba so!
ORANJESTAD (AAN) -- Solange Tchong, vocero di AZV a remarca, durante un entrevista cu DIARIO, cu por ripara cu tin hopi hende cu, ainda, ta bay afo sin un seguro di biahe.
“Di esey, AZV di su banda a keda semper concientiza nos hendenan, entre otro via nos plataformanan di social media, nos website y tambe nos revista Pulso, riba e importancia pa busca un seguro di biahe.
Banda di esey, nos ta kere cu basta seguro comercial toch ta haciendo intento cada dia mas, pa yega na un concientizacion di nos comunidad di Aruba, tocante e tema aki”, Solange Tchong a subraya.
El a añadi cu AZV su recomendacion ta keda pa no tuma e riesgo, pasobra un of dos dia mes, ta un riesgo caba.
“No ta importa si ta na Curacao of Bonaire bo ta bay, e momento cu bo ta sali, bo ta subi un avion, of un crusero bay p’afo di Aruba, hopi importante ta pa percura pa bo tin bo seguro di biahe, pasobra esaki ta cubri diferente parti, no solamente e parti medico cu ta esun cu pa nos ta esun di mas importante, pasobra nos sa cu bo no tin bo aseguro di AZV ora bo sali for di Aruba, pues bo mester tin un tipo di cobertura, pa por si acaso bo bira malo, of bo trompica durante bo biahe, bo a cay un caminda, bo tin e seguro ey di biahe cu ta cubri e ora ey bo gastonan”, Tchong a indica.
El a agrega cu ademas e aseguro ta cubri otro aspectonan di e biahe, por ehemplo si e persona a perde un camara, of nan a horta su maleta, of algo cu por a pasa durante e biahe.
“P’esey mes nos ta concientiza nos comunidad di Aruba pa tin su AZV app y esnan cu ta biaha pa cumpra nan seguro di biahe”, Solange Tchong a reitera, finalmente.
