Director di AZV, Edwin Jacobs:
*Nos ta laat compara cu internacionalmente
ORANJESTAD (AAN) – Director di AZV, Edwin Jacobs, den entrevista cu DIARIO a expresa cu importantisimo pa aña 2024, ta fortifica e cuido den prome liña, esta docternan di cas. El a anuncia tambe cu lo inverti pa percura prevencion di cancer di boca di matriz, locual ta importantisimo!
Jacobs a enfatiza cu e ta hopi importante den Aruba su sistema di cuido. El a expresa cu gratitud pa nan, pa loke nan a haci durante e periodo di pandemia.
El a comenta cu AZV a habri un hut na ImSan, y proximamente lo ta habriendo otro na Paradera, y nan lo contrata mas docter di cas.
“E proximo añanan nos ta bay pasa di 43 pa 56 docter di cas. Nos ta bay percura cu door di amplia e cantidad di docternan di cas, e reclamo cu nos tambe ta haya tur momento ‘cu mi no ta haya mi docter di cas’, nos kier yuda nos aseguradonan pa haya nan docter di cas”, director di AZV a señala.
El a reitera cu ta bay tin dos docter di cas extra, na e hut na ImSan y na esun na Paradera. Esaki ta un aspecto, e otro ta fortificacion, kiermen pa percura cu e asegurado wordo atendi trempan; cu e no mester tarda te ora cu e tin cu wordo manda na un specialista.
Ademas, e Praktijk Ondersteuners (POH’s) cu a wordo anuncia dos siman pasa, ora tabata tin firmamento cu Wit Gele Kruis, pa duna nan e fondo pa nan caba di completa e estudio cu e modulo di envehecemento, prevencion di salud, pero tambe pa bin cu dies POH’s mas.
“Tur dokter di cas mester tin na disposicion un POH, pa sigur mitad dia”, Jacobs a reitera. Esaki pa asisti e pashentnan cu ta bin bek door di problemanan cardiovascular, diabetes, etc., pa evita cu nan chock e di dos liña. “E di dos liña ta conoci cu ta mucho mas dificil pa haya e profesionalnan y ta mas costoso tambe. Pesey nos ta bay inverti den e prome liña”, Jacobs a indica.
Pesey AZV tin na caminda siete POH pa casonan di salud mental, lo percura tambe pa servicio di crisis di mucha y hoben, na Respaldo e aña aki. Lo inverti den un clinica pa mucha y hoben cu ta un necesidad. “Ta importantisimo e programa di prevencion di deteccion di cancer na boca di matriz, y nos ta laat caba cu esey, compara cu internacionalmente, pero nos ta bay haal in esaki. Mi kier gradici stichting BOB pa ta disponibel pa esaki, y asina ta un di nos stakeholders hopi importante”, director di AZV, Ir. Edwin Jacobs a duna di conoce.
