Solange Tchong, Relacionista Publico:
ORANJESTAD (AAN) – Den entrevista cu e Relacionista Publico di AZV, Solange Tchong, el a menciona cu hopi pashent cu tabata riba lista di spera pa tratamento medico den exterior, a wordo yuda caba.
El a splica cu na momento cu Colombia a habri porta bek pa ricibi pashentnan di Aruba, AZV a cuminza cu esaki y e ta bayendo den bon marcha.
“ Algo cu ta hopi positivo, ya cu nos ta den e ultimo luna di aña ta cu na 2023, AZV hunto cu sector medico a haci algun ampliacion temporal, pa loke ta specialismonan den retinologia, pa baha e lista di spera di specialistanan local aki na Aruba mes.
Tambe ta bay tin ampliacion tambe den specialismo pa kita dolor, y nan ta haya siete inyeccion special contra dolornan fuerte, manera lomba, etc.
Ademas ta bay haya un ampliacion e specialistanan di stoma, higra y tripa, pa asina baha e lista di spera, y pa ultimo riba e area di urologia, cu e meta di yuda sali for di e retrasonan cu a wordo causa, entre otro di Covid-19.
Tchong a expresa cu tambe mester ta realistico. Cu e retraso di un banda tin di haber cu un parti di logistica, y algun impacto cu a bin durante e aña cu Covid a afecta Aruba. Hunto cu tur specialista AZV ta bezig pa drecha esaki.
