Segun Oficina di Estadistica:
ORANJESTAD (AAN): Oficina Central di Estadistica ta presenta e resultadonan principal di e Indice di Prijs di Consumo (CPI) pa luna di December 2021.
Canasta di consumo
Den e ultimo aña cu a pasa 52.7% di productonan den e canasta di consumo di e CPI a conoce un aumento di prijs causando un efecto di 4.66 ppt, mientras cu 35.5% ta mustra un caida di prijs, cu a contribui cu un efecto di -1.01 ppt y pa e restante 11.8% no tabata tin cambio den prijs. Prijsnan di bienes a subi cu 5.1% y a causa un efecto di 2.88 ppt. Prijsnan di servicionan a conoce un subida di 1.8% y a causa un efecto di 0.77 ppt.
Bestaansminimum
Den e ultimo diesdos (12) lunanan e bestaansminimum pa un hogar consistiendo di dos (2) adulto y dos (2) mucha (edad 0-15 aña) e registra un subida di Afl. 150. E subida aki a wordo causa principalmente door di subida den e sectornan “Cuminda y bebida no-alcoholico” (Afl. 82) y “Transporte” (Afl. 41).
Cambio di prijs di petroleo, utilidad, gasolin y diesel
E prijs promedio pa bari di petroleo a conoce un subida di US$ 24.63 (52.7%) di US$ 46.78 na December 2020 pa US$ 71.41 na December 2021.
E indice di Energia a subi cu 9.3% den e ultimo aña. E indicenan di “Gasolin” y “Diesel” a registra subidanan di respectivamente, 35.3% y 42.2%, causando hunto un efecto di 1.42 ppt. E indicenan di e otro dos componentenan di Energia (“Electricidad” y “Awa”) no a cambia den e ultimo diesdos (12) lunanan. E restante 404 bienes y servicio hunto, a conoce un subida di 2.6% y tawata tin un efecto di 2.23.
Cambio di prijs di Cuminda y servicio di catering
Den e ultimo diesdos (12) lunanan e indice di “Cuminda & servicio di catering” a subi cu 3.8%. E indice di “Cuminda na cas” a conoce un subida di 4.3%, unda tur e diesun (11) indicenan di e gruponan di “Cuminda na cas” a subi durante e periodo aki.
E indice di “Azeta y otro productonan traha di vet” a conoce un subida di 15.2%, e subida mas grandi entre e gruponan di “Cuminda na cas”. Ademas otro subidanan significante a wordo registra den e indicenan di “Fruta” (10.2%), “Carni” (7.1%), “Batata, yuca y batata dushi” (5.6%), “Pisca y otro cuminda di lama” (3.2%) y “Pan y otro productonan di grano” (2.4%).
E indice di “Cuminda pafo di cas” a registra un subida di 2.7% den e ultimo diesdos (12) lunanan.
