ORANJESTAD (AAN) -- Ayo ta un atraccion cultural y natural di Aruba. E ta situa den un paisahe cu barancanan grandi. Pa gruponan di indigenanan e tabata un lugar sagrado y tabata tin un papel importante den nan creencia.
Personahenan specifico di e comunidadnan tabata practica ceremonianan na e sitio aki y drenta den contacto cu otro mundo y haya mensahenan di gran valor pa nan biba.
E mensahenan aki a ser expresa riba e partinan hol di cierto baranca den forma di lineanan y formanan pinta den color cora of blanco. Tin formanan geometrico y tin formanan cu caracteristicanan humano.
E sitio aki ta un di e 32 sitionan na Aruba cu tin pintura riba piedra y e ta un di e 6 sitionan di Aruba cu e pinturanan aki den color blanco. E ta sitio na Aruba unda tin mas pintura riba piedra cu ta tapa otro. Ta conoci cu aki tin 3 baranca cu pintura di Indian, di cua lamentablemente, riba un por mira poco rastro. E baranca mas importante tin un total di 27 pintura.
Fechamento door di tecnica di radio-carbon di un pintura den color blanco ta indica origen di +/- 1043 pa 1272 despues di Cristo, pues entre mil y 750 aña pasa. Fechamento aki no ta conta pa e otro pinturanan ya cu esaki mester sosode separa. Si e fechamento indica ta cuadra cu ta relata cu un periodo di transicion di historia di Aruba, tempo cu e di dos grupo di indigenan a yega y establece akinan, ta trata di e Caquetionan. Ta posibel cu e pinturanan na e sitio aki ta di Caquetionan of di e prome habitantenan di Aruba cu a yega na e Isla rond di 1500 prome cu Cristo.
E cantidad di pinturanan na e sitio aki y e hecho cu gran cantidad ta tapa otro ta indica su importancia den e creencia di e usuarionan y un uso intensivo di e lugar aki. Ningun otro parti di Aruba ta haya asina tanto pintura riba piedra cu ta tapa otro, na unda informacion sagrado ta ser cubri di otro informacion sagrado. Aunke nos no por compronde e nificacion cu nan tin pa nan creadornan, e pinturanan aki ta prueba cu Ayo ta espacio sagrado den e paisahe di Aruba.
Por ta cu e nificacion sagrado aki ta inspira artistanan visual local manera Gilbert Cijntje y Ronald Lemming pa traha obranan unico. Tin un coreografia di baile moderno cu yama Spirito di Ayo cu a ser estrena na 1993 den Festival International di Baile di Aruba.
Reconociendo su valor natural, historico, spiritual, sagrado y creativo nos por califica e sitio aki di Ayo como patrimonio cultural di Aruba. Pesey nos mester conserv’e, cuid’e y respet’e.
