Minister Glenbert Croes:
ORANJESTAD (AAN): Minister di Labor, Glenbert Croes a indica cu desde cu el a bira minister tabatin seis uitzendbureau cu permiso. Aworaki no tin ni un compania cu 'uitzendvergunning'.
E mandatario no a renoba e permiso pa niun di e seis companianan ey y no a duna ningun permiso nobo. E regla pa e companianan ey ta cambia.
A laga un comision traha riba e reglanan nobo pa 'uitzendvergunning'. "Abo ta uitzendbureau, ami ta contrata bo, abo ta contrata e compañero pa hopi menos bao di loke ta salario minimo. Pero e ta wordo paga menos cu salario minimo finalmente, pero e compania ta paga e uitzendbureau si salario minimo".
Aworaki tin 'uitzendvergunning' nobo, pero pa ora cu ta cuminsa otorga, despues di eleccion, y esaki ta encera cu ora di contrata un trahado e ta haya minimo salario minimo den su man, Croes a enfatisa.
No ta bay existi mas e situacion cu uitzendbureau ta wordo paga pa salario minimo y e ta kita e porcentahe di ganashi y ta paga e trahado menos cu salario minimo, a bisa.
Pesey na e momento aki no tin ningun compania cu 'uitzendvergunning'. Minister Croes no a renoba nan permiso na niun pasobra kier combati e fenomenonan negativo contra e trahado y loke ta pasando den practica.
Ta bay fortifica Departamento di Labor e seccion arbeidsbureau, arbeidsinspectie y duna nan e instrumentonan legal pa ora cu nan bay controla, si bo ta violando e leynan laboral bo ta violando derecho di trahado y bo por haya boet y cera bo negoshi of bo ta haya un warning, dependiendo con grave e situacion ta.
Minister Croes a indica cu aworaki e concepto di e ley aki tin cu aprob'e, bay Raad van Advies, despues bay Parlamento pa duna su aprobacion. Gobierno a duna su aprobacion caba.
