ORANJESTAD (AAN): Royal Aruba Aloe y Cosmedica Clinic Aruba a confirma na DIARIO, cu nan tin un colaboracion den un campaña di conscientisacion di solo
y e lansamento di un producto nobo di “Sun Care Lotion” specialmente diseña pa mucha. E iniciativa aki, dirigi pa Dra. Desiree Poortinga di Cosmedica y Royal Aruba Aloe, tin como meta pa educa e comunidad tocante e importancia di proteccion contra di solo y duna solucion accesibel pa garantisa salud di cuero di mucha.
E campaña, bou di e lema “Sun smart, skin strong: Shield from harmful rays all day long”, a cuminsa oficialmente e luna aki, y como parti di e programa piloto, e prome pakinan cu crema aden como “dispensers” di e ‘Very Water Resistant Suncare’ (VWR Suncare) a ser instala na Mon Plaisir Basis School y Kleuter na Aruba. Esaki pa duna studiante acceso facil pa proteccion contra di solo tur dia.
Nan enfoke di e campaña ta e introduccion di e ‘Very water resistant Aloe rich Suncare SPF 30’ den forma di dispenser na scolnan. E producto aki ta diseña pa duna proteccion superior di solo mientras cu e ta nutri e piel. Y lo mas miho, e ta hopi resistente mes contra awa. E sunblock SPF 30 hopi resistente contra awa ta formula cu un mescla unico di 100% Gel di Aloe Vera Puro di Aruba, Vitamina E, azeta di Coco y azeta di Jojoba, sin parabens, y ta laga bo piel sinti suave y moli mientras ta duna e proteccion di solo cu bo piel mester incluyendo proteccion di UVA/UVB.
E campaña aki ta un paso importante pa conscientisacion tocante seguridad di proteccion contra di solo entre e populacion mas hoben na Aruba.
