Eduard Pieters (PPA):
*Mester actua firmemente den e situacion conflictivo entre Merca y Venezuela
ORANJESTAD (AAN): E noticia cu Forsanan Arma di Merca a drenta Caracas y a captura Nicolas Maduro y su casa, Cilia Flores, a manda un ola di impacto rond mundo y a pone Aruba den un estado di alerta maximo. Consecuencia di esaki y segun conseho di Reino Hulandes ta pa cera e espacio aereo diasabra 3 di januari 2026 y lo evalua ki dia esaki lo por habri bek.
Logicamente e decision aki tin su impacto economico riba nos isla. Ademas, nos ta spera cu e situacion geopolitico lo por mehora pa nos operacionnan por bira normal bek
Fraccion di PPA for di luna di september 2025 caba a manda carta via presidente di parlamento pa yama un reunion urgente pa nos por a trata e situacion aki cu a sigui escala te na captura di sr. Maduro y su casa.
Pakico fraccion di PPA tabata y ta sigui ta insistente pa nos por tin dialogo cu gobierno? Pasobra den e ultimo 10 añanan Aruba a traha duro riba un sistema y maneho di crisis pa mitiga of elimina cualkier consecuencia negativo cu un menasa eminente, di salud publico, medio ambiente, cibernetico, geopolitico of di guera, por tin riba nos isla. Eduard a elabora: “Crisis Management Office (CMO) den un forma structural a sa di coordina e trabounan pa haci nos isla mas resiliente. CMO ta un instancia maneha pa nos propio yiunan di tera cu a percura pa profesionalisa y haya guia di profesionalnan internacional pa Aruba ta mas resiliente y por bons bek mas lihe posibel den caso di un menasa y calamidad. Aruba a demostra cu e sistema di maneho di crisis a funciona durante e pandemia di COVID-19. Aruba a sa di bons bek y a percura pa mitiga hende fayece na gran escala y pa un maneho economico financiero solido despues di a wordo destroza pa e consecuencianan durante y desoues dii e pandemia di COVID-19.”
Awo Aruba ta confronta otro menasa. Eduard a sigui relata: “Den luna di december fraccion di PPA, despues di a experencia un reunion publico na Hulanda caminda e ministernan Hulandes a presenta 4 diferente scenario como consecuencia di e conflicto entre Merca y Venezuela, a reuni bek den un Senioren Convent cu gobierno y a urgi gobierno pa sigui haci uzo di maneho di crisis coordina pa CMO pa evita cu cosnan por bay robes.” Algun ehempel concreto di esaki ta con e instancianan concerni (ATA, AHATA, DEHZI, etc) por mitiga cu nos economia lo sufri grandemente. Pero tambe un inventariacion di varios otro instancia pa logra haya sa kico tur Aruba tin na recurso (logistica) pa sobrebibi auscencia di importacion di cuminda, fuel, etc. Nos por a ripara cu diasabra minister presidente porfin a declara parti di inventarisacion cu nos propio profesionalnan bou coordinacion di e crisisteam a haci.
“Aruba a pasa den un crisis di salud publico mundial. Nos a siña di dje y sigur nos por aplica intervencionnan exitoso di pasado den e situacion actual. Nos mester mustra liderazgo y laga nos expertonan local den colaboracion cu otro expertonan internacional haci nan trabou.” Eduard di fraccion di PPA a sigui bisa.
“Nos no mester inventa e wiel di nobo. Nos profesionalnan den e sistema di maneho di crisis sa kico pa haci. Como bon lider nos mester confia den nan y laga nan haci nan trabou cu e meta comun (den e caso aki) pa no perhudica nos economia ni siguridad di Aruba y mas ainda no sembra panico riba e isla. E ta un situacion serio pero nos no mester bay den panico. Nos mester tuma accion cla segun conseho di nos profesionalnan cu ta conforma e team di crisis di Aruba. Dios bendiciona nos isla y cu Spirito Santo ilumina nos gobernantenan y profesionalnan” Eduard ta conclui.
