Fundador di DIARIO
ORANJESTAD (AAN): Awe Diahuebs 15 di October 2026, DIARIO ta observa e di diez aña di fayecimento di e visionario y alavez fundador di e Matutino di Aruba, esta Jossy Mehsen Mansur.
Tabata dia 15 di October 2016 cu Jossy a hala su ultimo rosea, y a bay laga atras un legado di lucha pa Aruba mantene su soberania, pa yuda informa comunidad di loke tabata pasando den e isla su sed pa independencia, y pa yuda guia e pais riba e forma corecto di enfrenta tur obstaculo cu tabata wordo pusha riba lomba di e isla.
Jossy Mansur como fundador di DIARIO, tabata kier pa Aruba a haya su propio corant, cu den cierto sentido a actua como un sorto di ‘ombudsman’ pa comunidad, y pesey su exigencia tabata pa nunca porta cera pa necesidad di un Arubiano.
Awe ta 10 aña cu e estadia di Jossy na mundo a yega na su fin. Un Arubiano kende a entrega su mes na e causa di su pais, a despedi di e campo di bataya den cual el a lucha pa nacemento y bienestar total di su pais natal, Aruba.
Ademas, uzando e reglanan di Ortografia aproba na Aruba na 1976, a yuda guia tur hende na e forma bunita pa skirbi Papiamento y trata na stop e formanan incorecto cu esaki tabata wordo skirbi algun lugar.
DIARIO no tabata solamente un medio pa bisa cu Aruba tin un medio di comunication skirbi, pero pa e Arubiano tin comunica riba tur tema cu otro cu palabranan Arubano, a base di mentalidad y costumber Arubano, y sin ningun miedo cu cualkier instancia den exterior, por exigi pa bay contra e interes di Aruba den DIARIO.
Tur celebracion di Aruba tabata haya espacio den DIARIO pero tambe tur dolor di Pueblo pa no papia mes di e lucha nacional pa Aruba logra su Status Aparte.
Contrario na algun oponente tabata bisa di dje, hamas bo tabata haya Jossy sinta den Casino, of na un fiesta ta bebe bira burachi. Lo bo haya casi semper Jossy sinta den su oficina na cas, te marduga ta skirbi su cantidad di buki, diccionario, y articulonan pa sali den DIARIO.
Su ausencia ta wordo sinti tur dia ainda na DIARIO. Tambe a haya sa cu su amigonan ta sinti su falta enormemente. Palabra di forza na henter famia, na tur empleado, y ex-empleado di DIARIO kendenan semper tabatin contacto directo cu Jossy.
Cu Jossy Mansur, sigui descansa na paz.
