ORANJESTAD (AAN): Februari 11 ta Dia Internacional di Hende Muhe y Mucha Muhe den ciencia,
un observacion global cu a wordo estableci pa Nacionnan Uni pa reconoce e rol critico cu hende muhe y mucha muhe tin den ciencia, tecnologia, ingenieria, y matematica (Stem). Pa Aruba, esaki no ta simplemente un fecha riba calendar sino un momento pa para keto y ripara con Aruba ta avansando riba e terenonan aki cu responsabilidad y haciendo uzo di cada oportunidad.
Rond mundo, hende muhe no tin bon representacion den e mundo cientifico. Apesar di progreso, ainda tin bareranan, accesonan limita, stereotiponan anticua, y un falta di role models visibel. Den un isla chikito manera Aruba, unda cu capital humano ta nos rikesa di mas grandi, nos no por permiti pa mita di nos talento keda atras.
Desaroyo sostenibel di Aruba ta depende di innovacion den energia renovabel, resiliencia climatico, transformacion digital, cuido di salud y proteccion ambiental. Hende muhe y mucha muhe mester ta na centro di e combersacionnan aki.
Aruba tin ehempelnan prometedor di liderazgo femenino den medicina, investigacion, educacion y tecnologia. Sinembargo, representacion mester expande mas leu cu participacion. E mester transforma den liderazgo activo, influencia y emprendimento den e sector Stem. Stimula muchanan muhe for di tempran pa exlora ciencia y matematica, no ta solamente cuestion di igualdad, e ta un cuestion diversificacion economico.
Un dia manera esaki, ta reta scolnan, sector priva y Gobierno pa fortalece programanan y inverti den educacion Stem, y crea plataformanan na unda cu muchanan muhe por visualisa nan mes como ingeniero, cientifico den data, biologo maritimo y innovadornan.
Si Aruba kier construi un economia basa riba conocimento, empodera hende muhe y mucha muhe den ciencia no ta opcion, e ta strategia y inversion den futuro.
