Mientras cu awe lo haya sa ki castigo PG ta exigi den caso Avestruz
- Esaki lo bay ta den Corte di Prome Instancia
ORANJESTAD (AAN): E siman aki ta bira hopi interesante den e caso apelacion Avestruz. Awe Procurador General ta bisa Hof di Corte Superior, kico e ta pensa di e acusadonan cu a apela nan sentencia y ki castigo e ta exigi pa nan.
Segun e planeamento di Hof, esaki lo bay ta den careda di 11’or di mainta. Posiblemente awe mes, algun abogado lo hiba defensa aunke cu abogado mr. Oomen for di siman pasa a pidi Hof pa e hiba defensa Diamars pasobra e kier studia e requisitorio di Procurador General pa reacciona ariba.
Caso kita propiedadnan di Sevinger: Awe Dialuna mainta, Corte di Husticia den Promer Instancia ta cuminsa cu tratamento di e caso cu Ministerio Publico a cuminsa contra Oslin Benny Sevinger pa kita propiedadnan, relaciona cu caso Avestruz.
Manera ta conoci, durante tratamento di e caso Avestruz den Promer Instancia, Fiscal di Ministerio Publico a anuncia cu lo cuminsa un caso di kita propiedadnan pasobra ta sospecha Benny Sevinger di labamento di placa. A menciona suma di mas o menos 1 Miyon Florin na balor na propiedad.
Por a compronde cu e caso lo no worde trata completo sino lo bay tin palabracion kico mas lo mester haci.
Fiscal lo presenta e caso y despues lo mira si e abogadonan mr. Kock y mr. Illes tin deseo pa investigacion(nan) tuma lugar. Despues di e parti aki lo bay palabra un fecha pa cuminsa cu tratamento di e caso.
