Cuerpo di Arbitro cu nan mensahe cla y raspa
ORANJESTAD (AAN): Fin di siman a start y futbol local keto bay stagna. E deadline 1:00 pm riba Diabierna 8 December a yega y pasa, y oficialmente Arubaanse Voetbal Bond (AVB) a ricibi ningun contesta di Cuerpo di Arbitro.
E silencio aki pues por worde mira como un mensahe cla y raspa di tur Referee na Aruba. Esta cu nan no ta acepta cu un team local a laga e coach agresivo Neil Jansen subi tereno back. Siendo cu e ta responsable pa pone un Referee na Aruba a perde un wowo. Esaki ta un acto condenable, y hasta AVB a expresa su deseo pa e coach aki no regresa hamas back den futbol.
Pueblo tambe ta cuestiona e team: Y den pueblo por sinti tambe e cuestionamento con dirigente di un team local a laga e coach aki back riba veld. Kico e rasonamento tabata ey tras, of di berdad no tin ningun otro coach mas disponible riba e isla.
Casonan similar (cu menos impacto riba salud di referee) a yega di socede den pasado. Coachnan cu a comete pifia asina, hamas a worde permiti regresa back pa duna instruccion na futbolistanan. Ningun team no gusta pa nan nomber worde atacha cu cierto individuonan cu no tin dominio riba nan rabia, y peor ora di merece di ta un ehemplo dilanti hobennan.
Esey a pone cu Cuerpo di Arbitro a pone trabao abao, weganan a stop, y AVB a core yama reunion pa asina trata na yega na un solucion riba e asunto. Siendo cu e unico solucion ta pa e coach ey empaketa maleta y bay duna les of coaching di e.o. boxeo, MMA, of lucha libre, aunke pa e deportenan ey bo mester tin disciplina propio y hamas bo por ataca un arbitro tampoco.
Diaranson anochi e reunion a tuma lugar, y AVB representa door di miembro di directiva y Hefe di Referee, a reuni cu representante di Cuerpo di Arbitro den e reunion unda a discuti e situacion actual y con por yega na otro pa resolve esaki mas liher posible. Na final di e reunion, e status quo a keda mescos como cu e Cuerpo di Arbitro a indica cu nan tin di bay back prome den nan seno, pa mira kico esnan den Referee ta dicidi, y asina lo avisa AVB back riba e decision. Diahuebs no a haya contesta, y a pidi pa warda te Diabierna. Asina a palabra cu Diabierna 8 di December pa 1:00 pm lo duna contesta.
Pues nan decision pa no fluit ningun wega mas tanten cu ta keda permiti e coach agresivo Neil Jansen na un veld di futbol.
Cancela tur wega di weekend: Diabierna merdia despues di 1:00 pm, AVB a indica cu nan no a ricibi contesta ainda di Cuerpo di Arbitro.
Esey a pone cu AVB a wordo obliga na cancela tur wega cu ta programa pa e weekend aki, di Diabierna 8 di December te cu Diadomingo 10 di December cu ta haci uso di Referee di AVB, esta, weganan di U17, U20, Damas U17, Damas Open Class, Division Uno y Hoofdklas ta posponi te proximo aviso mirando cu AVB no a haya un contesta di Cuerpo di Arbitro.
AVB lo informa over weganan programa desde Dialuna 11 di December no mas laat cu Dialuna mainta.
